سری لنکا کا ٹی ٹوئنٹی ورلڈ کپ کے لیے سیکیورٹی سخت کرنے کا فیصلہ، پاک بھارت میچز پر خصوصی توجہ

سری لنکا نے اگلے ماہ شیڈول ٹی ٹوئنٹی ورلڈ کپ کے لیے سیکیورٹی کے غیر معمولی انتظامات مکمل کر لیے ہیں۔ حکام کے مطابق تمام ٹیموں کی حفاظت کے لیے سربراہانِ مملکت کی سطح کے مسلح ایلیٹ کمانڈو یونٹس تعینات کیے جائیں گے۔ خاص طور پر 15 فروری کو کولمبو میں ہونے والے روایتی حریفوں بھارت اور پاکستان کے میچ کے لیے سیکیورٹی کو انتہائی ترجیحی درجہ دیا گیا ہے۔

ورلڈ کپ کی مشترکہ میزبانی کرنے والا سری لنکا 7 فروری سے 8 مارچ تک 20 میچوں کی میزبانی کرے گا۔ پاک بھارت کرکٹ میچز ہمیشہ سے سیاسی تناؤ کا مرکز رہے ہیں، خاص طور پر گزشتہ سال کے سرحدی تنازع کے بعد اب صورتحال مزید حساس ہے۔

پاکستان نے بھارت میں کھیلنے سے انکار کیا تھا، جس کے باعث آئی سی سی نے اس کے میچز سری لنکا منتقل کیے۔ دوسری جانب بھارت کے ساتھ سیکیورٹی تنازع پر بنگلہ دیش کے دستبردار ہونے کے بعد اسکاٹ لینڈ کو شامل کیا گیا ہے، جبکہ پاکستان نے بھی بنگلہ دیش سے اظہارِ یکجہتی کے لیے بائیکاٹ کا اشارہ دیا ہے۔

سری لنکن حکام نے علاقائی تنازعات میں غیر جانبدار رہنے کا فیصلہ کیا ہے، تاکہ ٹورنامنٹ متاثر نہ ہو۔ اس دوران میزبان ملک نے کینڈی اور کولمبو کے اسٹیڈیمز کی جدید کاری بھی مکمل کر لی ہے، تاکہ بین الاقوامی معیار کے مطابق ایونٹ کا انعقاد یقینی بنایا جا سکے۔