ڈیووس 2026: پاکستان اور سعودی عرب کا معاشی و باہمی تعاون بڑھانے پر اتفاق

پاکستان کے وزیرِ خزانہ محمد اورنگزیب نے عالمی اقتصادی فورم (ڈبلیو ای ایف) کے موقع پر ڈیووس میں سعودی عرب کے وزیرِ سرمایہ کاری خالد الفالح سے ملاقات کی۔ اس موقع پر دونوں ممالک کے درمیان جاری منصوبوں کا جائزہ لیا گیا اور معاشی و سرمایہ کاری تعاون کو مزید فروغ دینے کے طریقوں پر غور کیا گیا۔

ایک بیان کے مطابق اعلیٰ سطح ملاقات میں جاری تعاون کا جائزہ لیا گیا اور مختلف شعبوں میں موجودہ اور زیرِ منصوبہ منصوبوں پر ہونے والی پیش رفت پر غور کیا گیا۔

سعودی وزیر نے پاکستان کی اہمیت اور صلاحیتوں، بالخصوص اس کے قدرتی وسائل، اسٹریٹجک محلِ وقوع اور سرمایہ کاری کے لیے ابھرتے ہوئے مواقع کو سراہا۔

دونوں وزراء نے اس بات پر اطمینان کا اظہار کیا کہ دونوں ممالک کی تکنیکی ٹیمیں مشترکہ ترجیحات کو آگے بڑھانے اور آنے والی ملاقاتوں کے ثمر آور نتائج کو یقینی بنانے کے لیے پہلے ہی مل کر کام کر رہی ہیں۔ انہوں نے تعاون کو مزید گہرا کرنے کے لیے مسلسل ہم آہنگی کی اہمیت پر زور دیا۔

بیان کے مطابق دونوں اطراف نے مل کر کام کرنے، ادارہ جاتی روابط کو مضبوط بنانے اور مستقل بنیادوں پر اعلیٰ سطح کے رابطے برقرار رکھتے ہوئے دوطرفہ تعاون کو وسعت دینے کے پختہ عزم کا اعادہ کیا۔ انہوں نے اتفاق کیا کہ مسلسل رابطے اور باہمی افہام و تفہیم سے مشترکہ اہداف کو ٹھوس اور باہمی طور پر فائدہ مند اقدامات میں بدلنے میں مدد ملے گی۔

دونوں وزراء نے اس اعتماد کا اظہار کیا کہ قریبی شراکت داری اور مسلسل مذاکرات سے پاکستان اور سعودی عرب کے درمیان اقتصادی اور سرمایہ کاری کے تعلقات مزید مستحکم ہوں گے۔