قازقستان میں پیداوار کی معطلی کے خطرات کم ہونے پر تیل کی قیمتیں گرگئیں

خام تیل کی قیمتوں میں بدھ کو کمی دیکھی گئی کیونکہ امریکہ میں خام تیل کے ذخائر میں متوقع اضافے کا اثر قازقستان کے دو بڑے آئل فیلڈز میں پیداوار کے عارضی تعطل اور گرین لینڈ کے کنٹرول کے حصول کی کوشش پر امریکی محصولات (ٹیرف) کی دھمکیوں سے پیدا ہونے والے جغرافیائی سیاسی دباؤ پر حاوی رہا۔

برینٹ فیوچرز کی قیمت 76 سینٹ یا 1.2 فیصد کمی کے ساتھ 64.16 ڈالر فی بیرل رہی۔

دوسری جانب امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کے سودوں میں 60 سینٹ یا 1 فیصد کی کمی دیکھی گئی اور اس کی تجارت 59.76 ڈالر فی بیرل پر ہوئی۔

گزشتہ سیشن میں تیل کے دونوں سودوں کی قیمتیں تقریباً 1 ڈالر فی بیرل یا 1.5 فیصد اضافے کے ساتھ بند ہوئی تھیں، جس کی وجہ اوپیک پلس کے رکن قازقستان میں بجلی کی تقسیم کے مسائل کے باعث اتوار کو تینگیز اور کورولیف آئل فیلڈز سے پیداوار کا بند ہونا تھا۔

اس کے علاوہ چین کے مضبوط معاشی اعداد و شمار نے بھی مثبت اثر ڈالا۔ انڈسٹری کے تین ذرائع نے رائٹرز کو بتایا کہ قازقستان کے ان دونوں فیلڈز میں تیل کی پیداوار مزید سات سے دس دن تک معطل رہ سکتی ہے۔

آئی جی کے مارکیٹ تجزیہ کار ٹونی سیکامور نے بدھ کو کہا کہ دنیا کے سب سے بڑے آئل فیلڈز میں سے ایک تینگیز اور کورولیف میں تیل کی پیداوار کی معطلی عارضی ہے اور امریکی خام تیل کے ذخائر میں متوقع اضافے کے ساتھ جغرافیائی سیاسی تناؤ کی وجہ سے قیمتوں پر دباؤ برقرار رہے گا۔

امریکی صدر ڈونلڈ ٹرمپ کی جانب سے گرین لینڈ کا کنٹرول حاصل کرنے کے معاہدے میں ناکامی کی صورت میں یورپی ممالک پر نئے محصولات (ٹیرف) لگانے کے وعدے نے بھی تیل کی منڈیوں پر دباؤ بڑھا دیا ہے، کیونکہ ان محصولات سے معاشی ترقی سست ہونے کا خدشہ ہے۔“

رائٹرز کی ابتدائی رائے شماری کے مطابق، توقع کی جا رہی ہے کہ گزشتہ ہفتے امریکی خام تیل اور پٹرول کے ذخائر میں اضافہ ہوا ہوگا، جبکہ ڈسٹلیٹ کے ذخائر کم ہوئے ہوں گے۔

رائٹرز کے چھ ماہرین نے اندازہ لگایا کہ 16 جنوری تک ہفتے میں خام تیل کے ذخائر میں اوسطاً تقریباً 1.7 ملین بیرل کا اضافہ ہوا۔