ایران میں بگڑتی صورتحال، دفترِ خارجہ کی پاکستانیوں کو غیر ضروری سفر سے گریز کا مشورہ

دفتر خارجہ نے پاکستانی شہریوں کو مشورہ دیا ہے کہ وہ حالات بہتر ہونے تک اپنی حفاظت اور سلامتی کیلئے اسلامی جمہوریہ ایران کے ہر قسم کے غیر ضروری سفر سے گریز کریں۔

اپنی ٹریول ایڈوائزری میں دفتر خارجہ کے ترجمان طاہر انداربی نے ایران میں مقیم پاکستانیوں پر بھی زور دیا ہے کہ وہ انتہائی احتیاط برتیں، چوکس رہیں، غیر ضروری سفر کم سے کم کریں اور پاکستانی مشنز سے باقاعدہ رابطے میں رہیں۔

واضح رہے کہ یہ سفری مشورہ اس لیے جاری کیا گیا ہے کہ تہران میں گزشتہ ماہ شروع ہونے والے مظاہرے اب ایران کے تمام 31 صوبوں تک پھیل چکے ہیں۔

ایران میں حکومت مخالف بدامنی تیزی سے پھیل رہی ہے اور بین الاقوامی دباؤ بڑھ رہا ہے جس کے نتیجے میں روحانی قیادت اس وقت اس بحران کو قابو پانے میں ناکام نظر آتی ہے جو جمہوریہ کے مرکزی اداروں کی قانونی حیثیت کو چیلنج کررہا ہے۔

تہران کے گرینڈ بازار میں مقامی کرنسی ریال کی قدر میں شدید کمی پر غصے سے بھرے دکانداروں سے شروع ہونے والے یہ حالیہ احتجاج اب دیگر طبقات تک پھیل چکے ہیں جن میں اب خواتین اور لڑکیوں کے بجائے زیادہ تر نوجوان شامل ہیں۔

امریکہ میں قائم ہیومن رائٹس ایکٹوسٹس نیوز ایجنسی نے اطلاع دی ہے کہ ان بدامنی کے واقعات کے دوران کم از کم 34 مظاہرین اور چار سیکیورٹی اہلکار ہلاک جبکہ 2,200 افراد کو گرفتار کیا گیا ہے۔