ٹریٹ کارپوریشن کا دو نئے پرسنل کیئر برانڈز کی لانچنگ کی تاریخ میں تبدیلی کا اعلان

ٹریٹ کارپوریشن لمیٹڈ نے منگل کواعلان کیا کہ اس نے اپنے پرسنل کیئر برانڈز، جینیسس اور ایسٹیلا کی لانچنگ کی تاریخ تبدیل کردی ہے تاکہ برانڈز کا تعارف مارکیٹ کے زیادہ موزوں وقت کے ساتھ ہم آہنگ ہوسکے۔

لسٹڈ کمپنی نے اسٹاک ایکسچینج کو ایک نوٹس میں اس پیش رفت سے آگاہ کیا۔

نوٹس کے مطابق ان برانڈز کی لانچنگ پہلے 10 جنوری کیلئے طے کی گئی تھی، تاہم کمپنی اب رمضان المبارک کے پہلے ہفتے کے بعد جینیسس اور ایسٹیلا کو بیک وقت ملک بھر میں لانچ کرنے کا ارادہ رکھتی ہے۔

8 اکتوبر کو کمپنی نے اعلان کیا تھا کہ اس نے پرسنل کیئر سیکٹر میں اسٹریٹجک توسیع کی منظوری دے دی ہے جو مصنوعات میں جدت اور تنوع لانے کی اس کی دیرینہ روایت میں ایک اہم سنگِ میل کی حیثیت رکھتا ہے۔

اس اقدام کے تحت ٹریٹ دو نئے ملکیتی برانڈز یعنی جینیسس اور ایسٹیلا، متعارف کرائے گا۔

کمپنی نے اُس وقت کہا تھا کہ یہ برانڈز اور مصنوعات کمپنی کے اندرونی انوویشن ڈپارٹمنٹ کی جانب سے تیار کی جارہی ہیں اور ان کا مقصد شیوئنگ، گرومنگ اور پرسنل کیئر کی مکمل رینج فراہم کرنا ہے۔

اسی دوران آج جاری کیے گئے نوٹس میں کمپنی نے کہا کہ اسے یقین ہے کہ نئی ٹائم لائن مارکیٹ میں مؤثر تعارف اور برانڈ کی پائیدار مصروفیت کو یقینی بنائے گی۔

کمپنی کا مزید کہنا تھا کہ پہلے سے فراہم کردہ دیگر تمام اہم معلومات کے تمام پہلو تبدیل نہیں ہوئے ہیں۔

گزشتہ سال گروپ نے ہائجین ریزر سیکٹر میں توسیع کے منصوبے کا اعلان کیا تھا اور مقامی اور برآمدی طلب کو پورا کرنے کے لیے 430 ملین روپے کے سرمایہ کاری کی منظوری دی تھی۔

ٹریٹ کارپوریشن لمیٹڈ کو 1977 میں پاکستان میں بطور پبلک لسٹڈ کمپنی رجسٹر کیا گیا تھا۔

کمپنی ریزرز اور ریزر بلیڈز کی تیاری اور فروخت کے ساتھ ساتھ دیگر تجارتی سرگرمیوں میں بھی مصروف ہے۔ کمپنی کے پاس 75 سے زائد ایس کے یوز پر مشتمل مصنوعات کی ایک وسیع رینج ہے جس میں شیو کرنے والے ریزرز، باڈی ریزرز اور خواتین کے لیے مخصوص ریزرز شامل ہیں۔