اسحاق ڈار کی زیر صدارت مقامی پیٹرول میں ایتھنول کی آمیزش کے منصوبے پر اجلاس

نائب وزیراعظم اور وزیر خارجہ سینیٹر محمد اسحاق ڈار نے اعلیٰ سطح کے اجلاس کی صدارت کی، جس میں مقامی ریفائنریز کے تیار کردہ پیٹرول میں ایتھنول شامل کرنے کی تجویز کا جائزہ لیا گیا۔

اجلاس کے دوران چیئرمین آئل اینڈ گیس ریگولیٹری اتھارٹی (اوگرا) نے اس مجوزہ فریم ورک پر تفصیلی بریفنگ دی۔ مشاورت کے بعد کمیٹی نے نوٹ کیا کہ فی الوقت ایتھنول کی قیمتیں پیٹرول کی قیمتوں سے زیادہ ہیں، جس کی وجہ سے اس مرحلے پر لازمی آمیزش تجارتی طور پر قابلِ عمل نہیں ہے۔

اجلاس میں سفارش کی گئی کہ ایتھنول کی آمیزش کے لیے رضاکارانہ پالیسی کی اجازت دی جائے، تاہم یہ ریفائنریز اور ایتھنول تیار کرنے والوں دونوں کے لیے مالی طور پر سودمند ہونے سے مشروط ہوگی۔

اوگرا کو ہدایت دی گئی کہ وہ ایتھنول کی برآمدات سے حاصل ہونے والے مالی فوائد اور مقامی پیٹرول میں اس کے استعمال کے تقابلی جائزے کے لیے سہ ماہی بنیادوں پر رپورٹ تیار کرے۔ ریگولیٹر (اوگرا) اپنی یہ رپورٹ پیٹرولیم ڈویژن کے ذریعے وزیراعظم آفس (پی ایم او) کو غور کے لیے پیش کرے گا۔

اجلاس میں وزیراعظم کے معاونِ خصوصی طارق باجوہ، سیکرٹری پیٹرولیم، سیکرٹری صنعت و پیداوار، چیئرمین اوگرا اور پاکستان ایتھنول مینوفیکچررز ایسوسی ایشن اور پاکستان آٹوموٹیو مینوفیکچررز ایسوسی ایشن کے نمائندوں نے شرکت کی۔