گھٹنے کی انجری کے باعث شاہین آفریدی بگ بیش لیگ سے باہر

پاکستان کے مایہ ناز فاسٹ بولر شاہین شاہ آفریدی آسٹریلیا میں بگ بیش لیگ (بی ایل ایل) کے دوران گھٹنے کی انجری کا شکار ہونے کے بعد ٹورنامنٹ سے باہر ہو گئے ہیں۔

برسبین ہیٹ کی نمائندگی کرنے والے شاہین آفریدی نے سوشل میڈیا کے ذریعے مداحوں کو آگاہ کیا کہ پاکستان کرکٹ بورڈ (پی سی بی) نے انہیں ری ہیبلیٹیشن (بحالیِ صحت) کے عمل کے لیے واپس بلا لیا ہے اور اب وہ لیگ کے بقیہ میچز میں شرکت نہیں کر سکیں گے۔

شاہین آفریدی نے برسبین ہیٹ فرنچائز اور مداحوں کی جانب سے ملنے والی محبت اور حوصلہ افزائی پر ان کا شکریہ ادا کرتے ہوئے کہا کہ پی سی بی نے انجری کی وجہ سے مجھے واپس بلا لیا ہے۔انہوں نے جلد صحت یابی کی امید ظاہر کرتے ہوئے کہا کہ وہ اپنی ٹیم کی حوصلہ افزائی جاری رکھیں گے۔

یاد رہے کہ ایڈیلیڈ اسٹرائیکرز کے خلاف میچ کے دوران شاہین آفریدی نے گھٹنے میں تکلیف محسوس کی تھی، جس کے بعد کیے گئے طبی معائنے میں انجری کی نوعیت ایسی پائی گئی کہ انہیں مزید علاج کے لیے وطن واپس بلانا ناگزیر ہو گیا۔ 25 سالہ بائیں ہاتھ کے فاسٹ بولر کو میچ کے دوران میدان سے لنگڑاتے ہوئے باہر جاتے دیکھا گیا تھا۔

اگلے سال کے شروع میں ہونے والے آئی سی سی ٹی ٹوئنٹی ورلڈ کپ 2026 کو مدنظر رکھتے ہوئے پی سی بی ان کے ورک لوڈ اور انجری کے معاملے میں کوئی خطرہ مول نہیں لینا چاہتا۔

برسبین ہیٹ کی انتظامیہ اور پی سی بی کے طبی عملے نے باہمی مشاورت کے بعد شاہین کو لیگ سے دستبردار کرانے کا فیصلہ کیا ، تاکہ ان کی طویل مدتی فٹنس اور ورلڈ کپ کی تیاریوں کو ترجیح دی جا سکے۔

شاہین کی غیر موجودگی برسبین ہیٹ کے لیے ایک بڑا دھچکا ہے، کیونکہ ٹورنامنٹ کے اہم مرحلے پر ان کے پاس فاسٹ بولنگ کے آپشنز کم ہو گئے ہیں۔