آسٹریلیا کے کمنز اور انگلس دوسرے ایشیز ٹیسٹ کی دوڑ میں شامل

آسٹریلوی کپتان اسٹیو اسمتھ نے انگلینڈ کے خلاف دوسرے ایشیز ٹیسٹ میں فاسٹ بولر پیٹ کمنز کی ممکنہ واپسی کو مسترد کرنے سے گریز کرتے ہوئے کہا ہے کہ اگر سلیکٹرز جوش انگلس کو مڈل آرڈر میں شامل کرتے ہیں تو وہ ٹیم کے لیے اہم کردار ادا کر سکتے ہیں۔

کمنز کمر کی تکلیف کے باعث پرتھ ٹیسٹ سے باہر تھے اور گزشتہ ہفتے اعلان کردہ اسکواڈ میں بھی شامل نہیں تھے، تاہم اسمتھ کے مطابق وہ ٹریننگ میں اچھی حالت میں دکھائی دیے اور ان کا نام دوبارہ زیر غور آ سکتا ہے۔

اسمتھ نے کہا کہ کمنز نیٹ سیشن میں بہتر حالت میں نظر آئے ہیں، اگرچہ اصل میچ کی شدت مختلف ہوتی ہے۔ انہوں نے یہ بھی واضح کیا کہ ناتھن لیون کی شمولیت کی بھی حتمی تصدیق نہیں کی جا سکتی کیونکہ اگر کمنز واپس آتے ہیں تو اسپیشلسٹ اسپنر کو برقرار رکھ کر برینڈن ڈوگٹ کو ڈراپ کیا جا سکتا ہے۔

اوپنر عثمان خواجہ کمر کی انجری کے باعث باہر ہو چکے ہیں اور ٹریوس ہیڈ کے ڈے نائٹ ٹیسٹ میں اوپننگ کی توقع ہے، جنہوں نے پرتھ میں دوسری اننگز میں 123 رنز کی جارحانہ اننگز کھیل کر فتح میں کلیدی کردار ادا کیا تھا۔

مقامی میڈیا نے رپورٹ کیا ہے کہ انگلینڈ میں پیدا ہونے والے وکٹ کیپر بیٹر جوش انگلس کو مڈل آرڈر میں شامل کیا جا سکتا ہے، تاہم اسمتھ نے کہا کہ فائنل الیون کا فیصلہ پچ کا معائنہ کرنے کے بعد کیا جائے گا۔

انگلس نے جنوری میں گال میں سری لنکا کے خلاف ڈیبیو پر سنچری بنائی تھی اور اگر انہیں موقع ملا تو وہ بین اسٹوکس کی انگلینڈ ٹیم کے خلاف اپنا چوتھا ٹیسٹ کھیلیں گے۔ اسمتھ نے کہا کہ انگلس تیز گیندوں کے سامنے بہتر کھیلتے ہیں اور اچھی فارم میں ہیں۔

آسٹریلیا اب تک اپنے 13 میں سے 12 پنک بال ٹیسٹ جیت چکا ہے، جبکہ واحد شکست جنوری 2024 میں ویسٹ انڈیز کے خلاف گابا میں ہوئی تھی۔ پانچ ٹیسٹ میچوں کی سیریز میں آسٹریلیا کو 0-1 کی برتری حاصل ہے۔