ترکیہ کا سندھ کی خصوصی اقتصادی زونز میں سرمایہ کاری میں اظہار دلچسپی

سندھ کے وزیر اعلیٰ کے معاونِ خصوصی برائے سرمایہ کاری و پبلک پرائیویٹ پارٹنرشپ سید قاسم نوید قمر نے ترکیہ کے قونصل جنرل ایرگل کڈک اور کمرشل اتاشی مراد اوزمین سے سندھ انویسٹمنٹ ڈیپارٹمنٹ کے دفتر میں ملاقات کی، جس میں باہمی دلچسپی کے مختلف شعبوں پر گفتگو کی گئی۔

بیان کے مطابق ملاقات میں معاون خصوصی نے سندھ میں سرمایہ کاری کے مواقع پر تفصیلی بریفنگ دی، جن میں دھابیجی اور خیرپور اسپیشل اکنامک زونز، کراچی ایجوکیشن سٹی، ماربل سٹی کراچی، اور تعلیم، زراعت، توانائی، آئی ٹی، انفرا اسٹرکچر، پانی کی ری سائیکلنگ، ماحولیات اور صنعت سمیت دیگر شعبے شامل تھے۔

قاسم نوید قمر نے سندھ ٹرانسمیشن اینڈ ڈسپیچ کمپنی سمیت مختلف حکومتی اقدامات اور اسپیشل اکنامک زونز میں سرمایہ کاروں کے لیے ٹیکس مراعات پر بھی روشنی ڈالی۔

بیان کے مطابق ترکیہ کے قونصل جنرل نے سندھ میں خصوصاً کراچی ایجوکیشن سٹی میں سرمایہ کاری میں گہری دلچسپی کا اظہار کیا۔

معاونِ خصوصی نے ترکیہ کے وفد کو ضلع خیرپور میں کھجور کی پیداوار سے آگاہ کرتے ہوئے کھجور کے شعبے میں سرمایہ کاری کے امکانات سے بھی آگاہ کیا۔

انہوں نے کہا کہ صوبائی حکومت حیدرآباد میں ایک اسپیشل اکنامک زون کے قیام کے لیے پرعزم ہے، اور موٹر سائیکل و الیکٹرانک آلات بنانے والی کمپنیاں وہاں اپنے یونٹس قائم کرنے میں خصوصی دلچسپی لے رہی ہیں۔

معاونِ خصوصی نے اسپیشل اکنامک زونز میں سرمایہ کاری کے لیے ٹیکس چھوٹ اور دیگر مراعات کا بھی ذکر کیا۔

دریں اثنا سیکریٹری انویسٹمنٹ سندھ راجہ خرم شہزاد نے ترکیہ کے وفد کو صوبے میں موجود معدنی ذخائر، سرمایہ کاری کے لیے دستیاب شعبوں اور جاری منصوبوں سے آگاہ کیا۔