اردن کے شاہ عبداللہ دوم کا پاکستان کے دفاعی اداروں اور فیلڈ فائرنگ رینجز کا دورہ

اردن کے شاہ عبداللہ دوم ابن الحسین جو ہاشمی سلطنتِ اردن کے بادشاہ اور اردنی مسلح افواج کے سپریم کمانڈر ہیں اتوار کو راولپنڈی میں گلوبل انڈسٹریل اینڈ ڈیفنس سلوشنز (جی آئی ڈی ایس) کے دورے پر پہنچے۔ اس موقع پر ان کے ہمراہ شہزادی سلمیٰ بنت عبداللہ دوم اور اردن کے سول و عسکری حکام بھی موجود تھے۔

آئی ایس پی آر کے مطابق چیف آف آرمی اسٹاف (سی او اے ایس) فیلڈ مارشل سید عاصم منیر اور دیگر سینیئر عسکری حکام نے شاہی مہمانوں کا استقبال کیا۔

دورے کے دوران شاہ عبداللہ دوم کو جی آئی ڈی ایس کی ساخت، صلاحیتوں اور مصنوعات کے پورٹ فولیو پر تفصیلی بریفنگ دی گئی، جس میں پاکستان کی مقامی دفاعی پیداوار، تکنیکی جدت اور پاکستان و اردن کے درمیان دفاعی تعاون کے ممکنہ شعبے اجاگر کیے گئے۔

بعد ازاں شاہ عبداللہ دوم نے ٹلہ فیلڈ فائرنگ رینجز کا دورہ کیا، جہاں وزیر اعظم محمد شہباز شریف بھی موجود تھے۔ آذربائیجان کے وزیرِ دفاعی صنعت وُگار مصطفییف بھی معزز مہمانوں میں شامل تھے۔

شاہ عبداللہ دوم اور دیگر مہمانوں نے مشترکہ فائر اور مینوور مشق کا مشاہدہ کیا۔

مشق میں روایتی اور فضائی فائر پاور، مربوط زمینی حرکات، اسپیکٹرم وارفیئر اور مختلف کرداروں میں استعمال ہونے والے ملٹی پرپز ڈرونز کی صلاحیتوں کا عملی مظاہرہ کیا گیا۔

شاہ عبداللہ دوم نے تربیت کے اعلیٰ معیار، پیشہ ورانہ مہارت اور آپریشنل تیاری پر شریک دستوں اور فضائی عملے کی کارکردگی کو سراہا۔

اس موقع پر وزیر اعظم شہباز شریف نے شاہ عبداللہ دوم اور اردن کے عوام کے لیے پاکستان کے احترام اور محبت کا اظہار کرتے ہوئے کہا کہ یہ دورہ دونوں ممالک کے درمیان دیرینہ دوستی، باہمی اعتماد اور امن و ترقی کی مشترکہ خواہش کا عکاس ہے۔

سی او اے ایس فیلڈ مارشل عاصم منیر نے بھی پاکستان اور ہاشمی سلطنتِ اردن کے درمیان مضبوط دفاعی شراکت داری کو اجاگر کیا اور عسکری تعاون کو مزید فروغ دینے کے عزم کا اعادہ کیا۔

اس سے قبل شاہ عبداللہ دوم نے سی او اے ایس کو آرڈر آف دی ملٹری میرٹ (فرسٹ ڈگری) سے نوازا، جو پاکستان اور اردن کے درمیان عسکری تعاون کے فروغ میں ان کی نمایاں خدمات کے اعتراف میں دیا گیا۔

شاہ عبداللہ دوم کا یہ دو روزہ دورۂ پاکستان دونوں ممالک کے درمیان تاریخی برادرانہ تعلقات کو مزید مستحکم بنانے میں ایک اہم سنگِ میل قرار دیا جا رہا ہے۔