اردن کے شاہ عبداللہ کی اسلام آباد آمد، صدر آصف زرداری اور وزیر اعظم شہباز شریف نے استقبال کیا

وزیر اعظم محمد شہباز شریف کی دعوت پر اردن کے بادشاہ عبداللہ دوم ہفتے کے روز دو روزہ دورے پر اسلام آباد پہنچے ہیں۔

وزارتِ اعظم کے دفتر نے بتایا ہے کہ اسلام آباد آمد پر صدر آصف علی زرداری، وزیر اعظم محمد شہباز شریف، وفاقی وزیر برائے ماحولیاتی تبدیلی مصدق ملک اور وزیر مملکت برائے تعلیم واجیہہ قمر نے شاہ عبداللہ دوم اور ان کے اعلیٰ سطح کے وفد کا ہوائی اڈے پر استقبال کیا۔

اس موقع پر اظہارِ خیال کرتے ہوئے صدر آصف زرداری نے کہا کہ شاہ عبداللہ دوم کا دورہ پاکستان اور اردن کے تعلقات کو ایک نیا اسٹریٹجک پہلو دے گا۔ انہوں نے کہا کہ دونوں ممالک کے تعلقات تاریخی بھائی چارے، باہمی اعتماد اور مشترکہ اقدار پر مبنی ہیں۔

ایوان صدر کے بیان کے مطابق شاہ اردن کے طیارے کے پاکستانی فضائی حدود میں داخل ہونے پر پاکستان ایئر فورس کے JF-17 تھنڈر طیاروں کی ایک فلائنگ اسکواڈرن نے حفاظتی اسکورٹ فراہم کی اور شاہی پرواز کو اسلام آباد تک ہمراہ رکھا۔

شاہ عبداللہ دوم کا پاکستان کا یہ دورہ پاکستان اور اردن کے دیرینہ بھائی چارے پر مبنی تعلقات کی عکاسی کرتا ہے۔ یہ دورہ دونوں ممالک کے سیاسی، اقتصادی اور ثقافتی تعلقات کو مزید مضبوط کرنے میں مددگار ثابت ہوگا۔

شاہ عبداللہ دوم جلد ہی وزیر اعظم ہاؤس کا دورہ کریں گے، جہاں انہیں گارڈ آف آنر پیش کیا جائے گا، جس کی براہِ راست نشریات پاکستان ٹیلی ویژن پر کی جائیں گی۔

شاہ عبداللہ دوم وزیر اعظم شہباز شریف کے ساتھ وزیر اعظم ہاؤس میں دو طرفہ ملاقات کریں گے اور وفد کی سطح پر بھی مذاکرات ہوں گے۔

وزارتِ اعظم کے دفتر (پی ایم او) نے کہا ہے کہ بادشاہ عبداللہ دوم کا یہ دورہ پاکستان اور اردن کے دیرینہ تعلقات کو مزید مضبوط کرے گا اور دونوں برادر ممالک کے درمیان دو طرفہ تعاون کے دائرہ کار کو وسیع کرنے میں مددگار ثابت ہوگا۔