وفاقی کابینہ کے بعد قومی اسمبلی نے بھی آرمی ایکٹ میں ترامیم کی منظوری دے دی

آج نیوز کے مطابق جمعرات کو وفاقی کابینہ کے بعد قومی اسمبلی نے بھی پاکستان آرمی، پاکستان ایئر فورس اور پاکستان نیوی ایکٹس میں ترامیم کی منظوری دے دی ہے۔

وزیر دفاع خواجہ آصف نے پاکستان آرمی ایکٹ (ترمیمی) بل 2025، پاکستان ایئر فورس (ترمیمی) بل 2025 اور پاکستان نیوی (ترمیمی) بل 2025 پیش کیے، جو بعد میں اکثریتی ووٹ سے منظور کر لیے گئے۔

اس موقع پر بات کرتے ہوئے وزیر قانون اعظم نذیر تارڑ نے کہا کہ ترامیم اس لیے پیش کی گئی ہیں تاکہ 27ویں ترمیم کو موجودہ قوانین کے ساتھ ہم آہنگ کیا جا سکے۔ انہوں نے وضاحت کی کہ چیف آف ڈیفنس اسٹاف ( سی ڈی ایف) کی مدت ملازمت تقرری کی تاریخ سے پانچ سال ہوگی۔

انہوں نے مزید کہا کہ ایئر فورس اور نیوی کے قوانین میں بھی کچھ تبدیلیاں کی گئی ہیں۔

دن کے آغاز میں، وفاقی کابینہ نے تینوں مسلح افواج کی شاخوں سے متعلق قوانین میں ترامیم کی منظوری دی تھی۔