پاکستانی کمپنی پیس دبئی کی رئیل اسٹیٹ مارکیٹ میں داخل

پاکستان کی کمپنی پیس ((پی اے سی ای) نے اعلان کیا ہے کہ اس کے بورڈ آف ڈائریکٹرز نے دبئی، متحدہ عرب امارات میں ایک پلاٹ خریدنے اور وہاں تجارتی منصوبے کی ترقی کے لیے منظوری دے دی ہے، جو کمپنی کی بین الاقوامی رئیل اسٹیٹ مارکیٹ میں توسیع کا آغاز ہے۔

اس لسٹڈ کمپنی، جو فرسٹ کیپٹل گروپ کا حصہ ہے اور مختلف کاروباری شعبوں میں سرگرم عمل ہے، نے یہ پیش رفت پاکستان اسٹاک ایکسچینج (پی ایس ایکس) کے ساتھ شیئر کی ہے۔

بورڈ نے دبئی میں ایک ذیلی کمپنی کے قیام کی بھی منظوری دی تاکہ اس منصوبے کو عملی جامعہ پہنانے کے اقدامات کیے جا سکیں۔

اسٹاک فائلنگ کے مطابق، چیف ایگزیکٹو کو ضروری اقدامات کرنے اور تمام قانونی کارروائیاں مکمل کرنے کا اختیار دیا گیا ہے، اور وہ اپنی صوابدید کے مطابق یہ اختیارات مزید تفویض بھی کر سکتی ہیں۔

پیس ایک پبلک لمیٹڈ کمپنی ہے جس کا قیام پاکستان میں 1995 میں ہوا۔ کمپنی مختلف اقسام کی جائیداد جیسے کہ ڈیپارٹمنٹل اسٹورز، کنڈومینیمز، سپر مارکیٹس، شاپنگ پلازہ، ہاؤسنگ سوسائٹیز، یوٹیلٹی اسٹورز اور پلاٹس کے قیام، خرید و فروخت اور انتظام کے شعبوں میں سرگرم ہے۔

کمپنی پاکستان کے اندر اور بیرون ملک تجارتی، صنعتی اور دیگر متعلقہ سرگرمیاں بھی انجام دیتی ہے۔

حالیہ مہینوں میں متعدد پاکستانی کمپنیوں نے متحدہ عرب امارات، خاص طور پر دبئی میں اپنے آپریشنز کو وسعت دی ہے۔ جولائی میں، زاریا لمیٹڈ، پاکستان کے بڑے بی ٹو بی پلیٹ فارمز میں سے ایک، نے دبئی میں مکمل ملکیتی ذیلی کمپنی قائم کی۔ جون میں، اسماعیل انڈسٹریز لمیٹڈ نے ابو ظہبی میں ذیلی کمپنی قائم کرنے کے اپنے منصوبے کا اعلان کیا۔ ٹریٹ کارپوریشن لمیٹڈ نے بھی دبئی میں مکمل ملکیتی ذیلی کمپنی ٹریٹ ٹریڈنگ ایل ایل سی قائم کی۔

ماہرین کے مطابق، متحدہ عرب امارات میں دفتر قائم کرنے سے پاکستانی کمپنیوں کو عالمی ہب کے فوائد حاصل ہوتے ہیں، جہاں مناسب انفراسٹرکچر، قانونی فریم ورک اور سہل کاروباری ماحول موجود ہے۔