وزیرِاعظم کا آزادیِ صحافت کے تحفظ کے عزم کا اعادہ

وزیرِاعظم محمد شہباز شریف نے اتوار کے روز اس عزم کا اعادہ کیا کہ حکومت پاکستان آزادی صحافت کے تحفظ اور صحافیوں کے لیے محفوظ ماحول یقینی بنانے کے لیے پر عزم ہے۔

صحافیوں کے خلاف جرائم کے انسداد کے بین الاقوامی دن (2 نومبر) کے موقع پر اپنے پیغام میں وزیرِاعظم نے کہا کہ آزاد صحافت ایک مضبوط، شفاف اور جمہوری پاکستان کی ضمانت ہے۔

انہوں نے کہا کہ آج کا دن اس حقیقت کی یاد دہانی ہے کہ آزاد، باخبر اور ذمہ دار صحافت کسی بھی جمہوری معاشرے کی بنیاد ہوتی ہے۔ صحافی عوام تک حقائق کی رسائی ممکن بناتے ہیں اور سچائی کے علمبردار ہوتے ہیں۔

وزیرِاعظم ہاؤس کے میڈیا وِنگ کی جانب سے جاری بیان کے مطابق انہوں نے کہا کہ تشدد، دھمکیوں یا انتقام کے وہ تمام اقدامات جو صحافیوں کے پیشہ ورانہ فرائض کی انجام دہی کے دوران ان کے خلاف کیے جائیں، دراصل آزادیِ اظہار رائے پر حملہ ہیں۔

اس موقع پر وزیرِاعظم نے ان تمام صحافیوں کو خراجِ تحسین پیش کیا جنہوں نے سچ اور انصاف کے حصول میں مشکلات کا سامنا کیا، اور ان اہل خانہ سے اظہارِ یکجہتی کیا جن کے پیارے صحافت کے دوران جان سے گئے۔

انہوں نے مزید زور دیا کہ ہم تمام ضروری اقدامات کریں گے تاکہ صحافیوں کے خلاف جرائم کی مؤثر تحقیقات کو یقینی بنایا جا سکے، انصاف فراہم کیا جا سکے، اور ملزمان کے خلاف قانونی کارروائی عمل میں لائی جا سکے۔

وزیراعظم نے عالمی برادری، میڈیا تنظیموں اور سول سوسائٹی پر زور دیا کہ وہ صحافیوں کے تحفظ اور آزادیِ اظہار کے فروغ میں اپنا کردار ادا کریں۔