یورپی رہنماؤں نے یوکرین میں جنگ بندی پر صدر ٹرمپ کے مؤقف کی حمایت میں مشترکہ بیان جاری کردیا

یورپی ممالک کے رہنماؤں نے امریکی صدر ڈونلڈ ٹرمپ کی جانب سے یوکرین میں جنگ بندی کی کوششوں کی حمایت کرتے ہوئے ایک مشترکہ بیان جاری کیا ہے، جس میں فوری طور پر لڑائی ختم کرنے اور مذاکرات کے آغاز پر زور دیا گیا ہے۔

برطانوی حکومت کی جانب سے جاری کردہ اس بیان میں کہا گیا کہ ہم صدر ٹرمپ کے اس مؤقف کی بھرپور حمایت کرتے ہیں کہ لڑائی فوراً رکنی چاہیے، اور موجودہ لائن آف کنٹیکٹ (محاذِ جنگ کی حد) مذاکرات کے آغاز کی بنیاد ہونی چاہیے۔

بیان پر برطانیہ، فرانس، جرمنی، یوکرین اور یورپی یونین کے رہنماؤں نے دستخط کیے ہیں۔ رہنماؤں نے اس عزم کا اظہار کیا کہ وہ روس پر اقتصادی دباؤ بڑھانے کے لیے مشترکہ اقدامات کریں گے تاکہ روس کو امن مذاکرات پر آمادہ کیا جا سکے۔

بیان میں مزید کہا گیا کہ ہم روس کی معیشت اور اس کی دفاعی صنعت پر دباؤ بڑھانے کے لیے اقدامات کر رہے ہیں، یہاں تک کہ صدر پیوٹن امن قائم کرنے پر تیار ہو جائیں۔

رہنماؤں نے واضح کیا کہ وہ روس کے منجمد خودمختار اثاثوں کی مکمل قدر کو استعمال کرنے کے طریقے تیار کر رہے ہیں تاکہ یوکرین کو اپنی دفاعی ضروریات پوری کرنے اور معیشت کو سہارا دینے کے لیے درکار وسائل فراہم کیے جا سکیں۔

یاد رہے کہ امریکہ اور یورپی اتحادی ممالک یوکرین میں جاری جنگ کے خاتمے کے لیے سفارتی کوششوں میں مصروف ہیں، جبکہ روس پر اقتصادی پابندیوں کے اثرات مزید سخت کیے جا رہے ہیں تاکہ ماسکو کو جنگ بندی پر آمادہ کیا جا سکے۔