فرسٹ نیشنل ایکویٹیز کا رئیل اسٹیٹ و فارما شعبوں میں توسیع کا منصوبہ، 1.18 ارب کی سرمایہ کاری کا اعلان

فرسٹ نیشنل ایکویٹیز لمیٹڈ (ایف این ای ایل) نے پورٹ فولیو کو بہتر بنانے اور طویل مدتی ترقی کو فروغ دینے کے لیے 1.18 ارب روپے تک کے اسٹریٹجک سرمایہ کاری کے فیصلوں کا اعلان کیا ہے۔

کمپنی نے پیر کو پاکستان اسٹاک ایکسچینج (پی ایس ایکس) کو جاری کردہ نوٹس میں آگاہ کیا کہ اس نے کنگ بھائی ڈیجیسول (پرائیویٹ) لمیٹڈ میں اپنی 20 فیصد ایکویٹی حصص داری، یعنی 10,000 کلاس-بی نان ووٹنگ شیئرز، 28 کروڑ روپے کے عوض فروخت کرنے پر اتفاق کرلیا ہے۔

نوٹس کے مطابق یہ لین دین ایک مضبوط قدر (روبسٹ ویلیوایشن) کی عکاسی کرتا ہے جس میں کنگ بھائی ڈیجیسول (پرائیویٹ) لمیٹڈ کی انٹرپرائز ویلیو کا آزادانہ طور پر تقریباً 1.5 ارب روپے کا اندازہ لگایا گیا ہے۔

ایف این ای ایل نے بتایا کہ یہ سرمایہ فروخت اس کی اُس حکمتِ عملی کے مطابق ہے جس کا مقصد سرمایہ کی قدر میں اضافہ اور اسے زیادہ تیزی سے ترقی کرنے والے منصوبوں کی جانب منتقل کرنا ہے۔

بورڈ نے ایف این ای ایل کی ذیلی کمپنی ایف این ای ڈیولپمنٹس (پرائیویٹ) لمیٹڈ میں 40 کروڑ روپے تک کی سرمایہ کاری کی منظوری بھی دے دی ہے۔

یہ ذیلی کمپنی جس نے گزشتہ ماہ اپنے آپریشنز کا آغاز کیا، پبلک اور پرائیویٹ سیکٹر کے نمایاں اسٹیک ہولڈرز کے ساتھ اشتراک میں بڑے پیمانے کے منصوبے شروع کرنے کے لیے قائم کی گئی تھی۔

نوٹس میں کہا گیا کہ یہ عزم اس بات کو اجاگر کرتا ہے کہ کمپنی کی توجہ رئیل اسٹیٹ اور انفرااسٹرکچر ڈیولپمنٹ کے شعبوں میں ترقی کے عمل کو تیز کرنے پر مرکوز ہے، جہاں پائیدار اور مستحکم آمدنی کے مضبوط امکانات موجود ہیں۔

مزید برآں بورڈ نے فارماسیوٹیکل سیکٹر میں انٹری کے لیے 50 کروڑ روپے تک کی سرمایہ کاری کی منظوری بھی دی ہے جو کسی مینوفیکچرنگ فیکٹری یا کمپنی کے قیام یا حصول کے ذریعے کی جائے گی۔ یہ سرمایہ کاری کمپنی کی ذیلی یا وابستہ اداروں کے اشتراک سے یا خودمختار طور پر عمل میں لائی جا سکتی ہے۔

کمپنی نے مزید کہا کہ یہ اقدام پاکستان کی سب سے زیادہ امید افزا اور تیز رفتار ترقی والی صنعتوں میں ایک اہم تنوع (ڈائیورسیفیکیشن) کی نشاندہی کرتا ہے۔

فرسٹ نیشنل ایکویٹیز لمیٹڈ ایک محدود ذمہ داری والی کمپنی ہے جو کمپنیز آرڈیننس، 1984 (جو اب کمپنیز ایکٹ، 2017) کے تحت پاکستان میں رجسٹرڈ ہے۔

کمپنی کی بنیادی سرگرمیوں میں شیئر بروکریج، مشاورتی خدمات اور سرمایہ کاری پورٹ فولیو کا انتظام شامل ہے۔