بلوچستان میں آپریشن، بھارت نواز 7 دہشت گرد ہلاک کردئیے، آئی ایس پی آر

فوج کے شعبہ تعلقات عامہ (آئی ایس پی آر) نے جمعہ کو اطلاع دی کہ بلوچستان کے ضلع شیرانی میں سیکیورٹی فورسز نے سات بھارت نواز دہشت گردوں کو ہلاک کر دیا ہے۔

آئی ایس پی آر کے مطابق یکم اکتوبر کو ضلع شیرانی میں دہشت گرد تنظیم فتنہ الخوارج کے بھارتی پراکسی عناصر کی موجودگی کی اطلاع پر انٹیلی جنس بنیاد پر آپریشن (آئی بی او) کیا گیا۔

بیان میں کہا گیا کہ آپریشن کے دوران فورسز نے دہشت گردوں کے ٹھکانے کو مؤثر طریقے سے نشانہ بنایا، اور شدید فائرنگ کے تبادلے کے بعد سات بھارت نواز دہشت گردوں کو جہنم واصل کر دیا گیا۔

آئی ایس پی آر نے مزید بتایا کہ ہلاک دہشت گردوں کے قبضے سے اسلحہ، گولہ بارود اور دھماکہ خیز مواد برآمد ہوا، جو علاقے میں کئی دہشت گردانہ سرگرمیوں میں ملوث رہے تھے۔ علاقے کو کلیئر کرنے کے لیے سرچ آپریشن بھی جاری ہے تاکہ کسی بھی چھپے ہوئے دہشت گرد کو ختم کیا جا سکے۔ بیان میں کہا گیا کہ پاکستان کی سیکیورٹی فورسز بھارتی سرپرستی یافتہ دہشت گردی کے ناسور کو ختم کرنے کے لیے پرعزم ہیں اور دہشت گردوں کو انصاف کے کٹہرے میں لانے کے لیے قوم کے غیر متزلزل عزم کا اعادہ کرتی ہیں۔

وزیراعظم محمد شہباز شریف نے شیرانی میں سات بھارت نواز دہشت گردوں کو ہلاک کرنے پر سیکیورٹی فورسز کو سراہا۔ وزیراعظم آفس کے مطابق انہوں نے کہا کہ یہ دہشت گرد معصوم اور نہتے شہریوں کی جان و مال کے نقصان کے ذمہ دار تھے، جنہیں فیصلہ کن کارروائی میں شکست دے دی گئی۔

وزیراعظم نے کہا کہ ہم دہشت گردی کی جڑ اکھاڑ پھینکیں گے۔ انہوں نے خبردار کیا کہ پاکستان کی سرزمین اور سالمیت کو نقصان پہنچانے کی کوشش کرنے والے عناصر کامیاب نہیں ہو سکیں گے۔

اس سے قبل آئی ایس پی آر نے بتایا تھا کہ یکم اکتوبر کو بلوچستان کے مختلف علاقوں میں آپریشنز کے دوران 13 دہشت گرد مارے گئے اور 4 کو گرفتار کیا گیا۔ ان میں خضدار میں خواتین کا بھیس بدل کر فرار کی کوشش کرنے والے دہشت گرد بھی شامل تھے۔

پاکستان نے گزشتہ چند برسوں میں سرحد پار سے دہشت گرد حملوں میں اضافہ دیکھا ہے، خاص طور پر خیبر پختونخوا اور بلوچستان میں حملے بڑھ گئے ہیں۔

پاکستان انسٹیٹیوٹ فار کانفلکٹ اینڈ سیکیورٹی اسٹڈیز (پی آئی سی ایس ایس) کے مطابق اگست 2025 گزشتہ ایک دہائی سے زیادہ عرصے کا سب سے خونریز مہینہ رہا، جب 143 حملوں میں 194 افراد جاں بحق اور 231 زخمی ہوئے۔

رپورٹ میں کہا گیا کہ عسکریت پسندوں نے نہ صرف حملوں کی تعداد بڑھائی بلکہ حکمت عملی میں بھی تنوع لایا، جن میں گھات لگا کر حملے، ٹارگٹ کلنگ، آئی ای ڈی اور دستی بم حملے شامل ہیں۔ جواب میں سیکیورٹی فورسز نے اگست میں ملک بھر میں 41 کارروائیاں کیں، جن میں 100 سے زائد دہشت گرد مارے گئے اور 31 گرفتار ہوئے۔ سب سے زیادہ ہلاکتیں بلوچستان اور خیبر پختونخوا میں ہوئیں، جہاں بڑی کارروائیوں میں بی ایل اے اور بی ایل ایف کے اہم کمانڈرز بھی مارے گئے۔