بلوچستان میں کارروائیاں: 13 دہشت گرد ہلاک، 4 گرفتار، آئی ایس پی آر

پاک فوج کے شعبۂ تعلقات عامہ (آئی ایس پی آر) کے مطابق گزشتہ دو روز کے دوران بلوچستان کے مختلف علاقوں میں خفیہ اطلاعات کی بنیاد پر کی جانے والی کارروائیوں میں 13 دہشت گرد ہلاک اور 4 گرفتار کر لیے گئے ہیں۔

بیان میں بتایا گیا ہے کہ یکم اکتوبر کو ضلع خضدار میں چار دہشت گرد خواتین کا لباس پہن کر فرار ہونے کی کوشش کر رہے تھے، جنہیں بروقت کارروائی کرتے ہوئے گرفتار کر لیا گیا۔

سیکورٹی فورسز نے ان کے قبضے سے بھاری مقدار میں اسلحہ اور گولہ بارود بھی برآمد کیا۔ آئی ایس پی آر کے مطابق گرفتار دہشت گرد علاقے میں متعدد حملوں میں ملوث رہے ہیں۔

اک فوج کے شعبۂ تعلقات عامہ (آئی ایس پی آر) کے مطابق، 30 ستمبر اور یکم اکتوبر کو بلوچستان کے اضلاع کوئٹہ اور کیچ میں دو الگ الگ انٹیلیجنس بیسڈ آپریشنز (آئی بی اوز) کیے گئے۔

بیان کے مطابق کوئٹہ میں سیکورٹی فورسز نے دہشت گردوں کے ایک ٹھکانے پر کارروائی کی، جہاں فائرنگ کے تبادلے کے بعد 10 دہشت گرد ہلاک کر دیے گئے۔

اسی طرح کیچ میں ایک اور خفیہ ٹھکانے کے خلاف ہدفی کارروائی کے دوران مزید 3 دہشت گرد مارے گئے۔

آپریشنز کے دوران بھاری مقدار میں اسلحہ، گولہ بارود اور دھماکا خیز مواد برآمد کیا گیا جبکہ کلئیرنس اور سینیٹائزیشن کا عمل اب بھی جاری ہے۔

آئی ایس پی آر نے کہا کہ پاکستان کی سیکورٹی فورسز دہشت گردی کے مکمل خاتمے کے لیے پُرعزم ہیں اور قوم کے اس عہد کی تجدید کرتی ہیں کہ دہشت گردوں اور ان کے سہولت کاروں کو انصاف کے کٹہرے میں لایا جائے گا۔