چناب لمیٹڈ میں قیادت کی تبدیلی،محمد نعیم مستعفیٰ ، میاں محمد لطیف نئے سی ای او مقرر

پاکستان کی سرکردہ ٹیکسٹائل ایکسپورٹر کمپنی چناب لمیٹڈ نے قیادت میں اہم ردوبدل کا اعلان کیا ہے۔ کمپنی کے چیف ایگزیکٹو آفیسر (سی ای او) محمد نعیم نے 24 ستمبر 2025 سے عہدے سے استعفیٰ دے دیا جس کے بعد بورڈ آف ڈائریکٹرز نے سابق چیئرمین میاں محمد لطیف کو نیا سی ای او مقرر کیا ہے۔ اس دوران بورڈ نے چیئرمین کے عارضی خالی عہدے کے لیے میاں محمد جاوید اقبال، جو غیر ایگزیکٹو ڈائریکٹر ہیں، کو نامزد کیا ہے۔

چناب لمیٹڈ نے منگل کو اسٹاک ایکسچینج کو بھیجے گئے اپنے نوٹس میں اس پیشرفت کا انکشاف کیا۔

نوٹس میں کہا گیا ہے کہ ہم آپ کو مطلع کرنا چاہتے ہیں کہ کمپنی (چناب لمیٹڈ) کے ڈائریکٹر/چیف ایگزیکٹو آفیسر (سی ای او) محمد نعیم نے 24 ستمبر 2025 سے سی ای او کے عہدے سے استعفیٰ دے دیا ہے۔

ان کی جگہ بورڈ آف ڈائریکٹرز نے میاں محمد لطیف کو نیا سی ای او مقرر کرنے کی منظوری دی ہے جنہوں نے چیئرمین کے عہدے سے استعفیٰ دیا تھا۔

میاں محمد لطیف چناب گروپ کے بانی ہیں اور انہوں نے پاکستان کی ٹیکسٹائل صنعت کو تشکیل دینے میں نمایاں کردار ادا کیا، نیز ملک میں مشہور ریٹیل برانڈ چین ون متعارف کروایا۔

اس کے علاوہ بورڈ آف ڈائریکٹرز نے چیئرمین کے عارضی خالی عہدے کو پُر کرنے کے لیے میاں محمد جاوید اقبال، جو کہ غیر ایگزیکٹو ڈائریکٹر ہیں، کو بورڈ کا چیئرمین مقرر کرنے کی تجویز دی۔

چناب لمیٹڈ کو 1985 میں پرائیویٹ لمیٹڈ کمپنی کے طور پر رجسٹر کیا گیا اور بعد ازاں اسے پبلک لمیٹڈ کمپنی میں تبدیل کیا گیا۔

اس کے عام اور ترجیحی حصص بالترتیب 2004 اور 2005 میں پاکستان اسٹاک ایکسچینج میں درج ہوئے۔

کمپنی ویلیو ایڈڈ فیبرکس، ٹیکسٹائل میڈ-اپس، اور کیژول و فیشن گارمنٹس کی برآمد کے کاروبار کے ساتھ ساتھ مقامی مارکیٹ میں فیبرک کی ٹول مینوفیکچرنگ بھی کرتی ہے، جس سے یہ ملکی اور بین الاقوامی سطح پر ٹیکسٹائل سیکٹر میں مضبوط مقام رکھتی ہے۔