غزہ جنگ کے تناظر میں اسرائیل میں تعینات امریکی سفیر کا قاہرہ کا غیر معمولی دورہ

اسرائیل میں تعینات امریکی سفیر مائیک ہکابی مصری حکام کے ساتھ بات چیت کے لیے قاہرہ کا دورہ کریں گے۔ امریکی سفارت خانے کے ترجمان نے اتوار کو اس غیر معمولی دورے کی تصدیق کی۔ میڈیا رپورٹس کے مطابق یہ کئی دہائیوں میں پہلا موقع ہو گا جب اسرائیل میں کسی امریکی سفیر نے مصر کا دورہ کیا ہو۔

ترجمان نے اے ایف پی کو بتایا کہ ہکابی کی مصری حکام سے ملاقاتیں خطے میں امریکی سفارت خانوں کے درمیان باقاعدہ سفارتی مشاورت کا حصہ ہیں۔ ترجمان کے مطابق یہ دورہ خطے میں مشترکہ اہداف کو آگے بڑھانے کے لیے علاقائی شراکت داروں کے ساتھ کھلے اور تعمیری بات چیت کو برقرار رکھنے کے امریکہ کے جاری عزم کی عکاسی کرتا ہے۔

توقع ہے کہ اس بات چیت کا محور غزہ کی جنگ ہو گا، جس نے اسرائیل اور قاہرہ کے درمیان تعلقات کو کشیدہ کر رکھا ہے۔ مصر، امریکہ اور قطر کے ساتھ مل کر اسرائیل اور حماس کے درمیان جنگ کے خاتمے کی کوششوں میں ثالثی کر رہا ہے۔ قاہرہ نے غزہ شہر میں اسرائیل کے فضائی اور زمینی حملے پر سخت تنقید کی ہے اور بارہا خبردار کیا ہے کہ لڑائی سے لاکھوں فلسطینیوں کو اس کی سرحد پار کر کے جزیرہ نما سینائی میں دھکیلنے کا خطرہ ہے۔

ہکابی کا یہ دورہ امریکی صدر ڈونلڈ ٹرمپ کی جانب سے عرب اور مسلم رہنماؤں کے ساتھ غزہ جنگ کے خاتمے کے لیے ایک نئے منصوبے کی نقاب کشائی کے چند روز بعد ہو رہا ہے۔ ہکابی کو نومبر میں دوبارہ منتخب ہونے کے فوراً بعد ٹرمپ نے اسرائیل میں سفیر مقرر کیا تھا۔