کریسنٹ اسٹار انشورنس کو ایس ای سی پی سے 3 روپے فی شیئر رائٹس ایشو کی منظوری

کریسنٹ اسٹار انشورنس لمیٹڈ (سی ایس آئی ایل) نے اعلان کیا ہے کہ سیکیورٹیز اینڈ ایکسچینج کمیشن آف پاکستان (ایس ای سی پی) نے کمپنی کو 3 روپے فی شیئر کے حساب سے رائٹس ایشو جاری کرنے کی منظوری دے دی ہے۔

یہ پیش رفت سی ایس آئی ایل کی جانب سے پاکستان اسٹاک ایکسچینج (پی ایس ایکس) کو جمعہ کو جاری کردہ نوٹس میں شیئر کی گئی۔ کمپنی کے مطابق رائٹس ایشو سے حاصل ہونے والی رقم انڈر رائٹنگ کی صلاحیت میں اضافہ، نئے کاروباری شعبوں میں توسیع اور گزشتہ برسوں میں قائم کی گئی مضبوط بنیاد پر مزید ترقی کے لیے استعمال کی جائے گی۔

یہ اہم پیش رفت اسلام آباد ہائی کورٹ کے حالیہ فیصلے کے بعد سامنے آئی جس میں سی ایس آئی ایل کے گارنٹی بزنس کو ختم کرنے کے احکامات کو غیر قانونی اور کالعدم قرار دیا گیا تھا۔

کمپنی کا کہنا ہے کہ اس فیصلے کے نتیجے میں گارنٹی بزنس کی بحالی اس کی قانون پر عملدرآمد، ذمہ دار گورننس اور کاروباری تنوع کی پالیسی کا مظہر ہے، جس کا مقصد کسی ایک بزنس کلاس پر انحصار کم کرنا ہے۔

کریسنٹ اسٹار انشورنس لمیٹڈ، جو 1957 میں قائم ہوئی، ایس ای سی پی کے ساتھ رجسٹرڈ ایک انشورنس کمپنی ہے جس کا ادا شدہ سرمایہ 1.077 ارب روپے ہے۔

کمپنی پاکستان بھر میں موٹر، ہیلتھ، فائر، میرین، انجینئرنگ، ٹریول، لائیو اسٹاک، کراپ اور متفرق شعبوں میں جنرل انشورنس کی خدمات فراہم کررہی ہے۔