امریکی کمپنی انگریڈین کا رفحان میز میں اکثریتی حصص فروخت کرنے کا فیصلہ

انگریڈین انکارپوریٹڈ (Ingredion Incorporated)، جو رفحان میز پروڈکٹس کمپنی لمیٹڈ (آر ایم پی ایل) کا اکثریتی شیئرہولڈر ہے، نے نشاط ہوٹلز اینڈ پراپرٹیز لمیٹڈ کو اپنی 51.04 فیصد حصص فروخت کرنے کے لیے ایک مشروط معاہدے پر دستخط کر دیے ہیں۔

آر ایم پی ایل، جو پاکستان کی سب سے بڑی ایگرو بیسڈ کمپنیوں میں شمار ہوتی ہے، نے جمعہ کے روز پاکستان اسٹاک ایکسچینج کو جاری اپنے نوٹس میں اس پیش رفت سے آگاہ کیا۔

نوٹس میں کہا گیا کہ ہمیں اپنے اکثریتی شیئرہولڈر انگریڈین انکارپوریٹڈ کی جانب سے مطلع کیا گیا ہے کہ انہوں نے نشاط ہوٹلز اینڈ پراپرٹیز لمیٹڈ کے ساتھ کمپنی میں اپنے 51.04 فیصد شیئرز کی فروخت کے لیے ایک مشروط شیئر پرچیز ایگریمنٹ پر دستخط کیے ہیں۔

کمپنی نے مزید بتایا کہ اس ٹرانزیکشن کے ذریعے انگریڈین کمپنی میں اپنی ایکویٹی کم کرے گا۔

نوٹس کے مطابق اس ٹرانزیکشن کی تکمیل فریقین کے درمیان طے شدہ مختلف شرائط اور متعلقہ ریگولیٹری منظوریوں کے حصول سے مشروط ہے۔

یاد رہے کہ رواں سال مئی میں یہ خبر سامنے آئی تھی کہ انگریڈین انکارپوریٹڈ، جو امریکا میں قائم ایک فوڈ اینڈ بیوریج انگریڈینٹس فراہم کرنے والی کمپنی ہے، آر ایم پی ایل میں اپنے حصص فروخت کرنے کی پیشکشوں کا جائزہ لے رہی ہے۔

اس اعلان کے بعد، نشاط ہوٹلز اینڈ پراپرٹیز لمیٹڈ (جو نیشات گروپ کا حصہ ہے) نے آر ایم پی ایل میں زیادہ سے زیادہ 75.69 فیصد شیئرز حاصل کرنے کی نیت ظاہر کی ہے۔

نشاط ہوٹلز اینڈ پراپرٹیز لمیٹڈ بنیادی طور پر شاپنگ مال، ہوٹل اور بینکوئٹ ہالز کو ’نشاط ایمپوریم‘ اور ’نشاط ہوٹل‘ کے ناموں سے اون اور آپریٹ کرتا ہے۔ کمپنی ریئل اسٹیٹ کے کاروبار میں بھی ’نشاط ریزیڈنسز‘ کے نام سے سرگرم ہے، جس میں زیادہ تر رہائشی اپارٹمنٹس شامل ہیں۔

دوسری جانب، آر ایم پی ایل نے پاکستان میں 1953 میں ایک مکئی ریفائننگ انڈسٹری کے طور پر اپنا کام شروع کیا۔ وقت کے ساتھ ساتھ کمپنی ملک کی سب سے بڑی ایگرو بیسڈ انڈسٹریز میں شامل ہو گئی۔ یہ کمپنی مکئی کو بطور خام مال استعمال کرتے ہوئے مختلف فوڈ انگریڈینٹس اور صنعتی مصنوعات تیار کرتی ہے۔ 1985 میں آر ایم پی ایل کو پبلک لمیٹڈ کمپنی کا درجہ دیا گیا۔