مشرقِ وسطیٰ میں کشیدگی، عالمی منڈی میں تیل کی قیمتیں مستحکم

عالمی منڈی میں تیل کی قیمتوں میں منگل کے روز کوئی خاص تبدیلی دیکھنے میں نہیں آئی، کیونکہ سرمایہ کار مشرقِ وسطیٰ اور روس میں جاری جغرافیائی کشیدگی کے ساتھ ساتھ تجارتی ٹیرف کے خدشات پر غور کرتے رہے، جو ایندھن کی طلب کو متاثر کر سکتے ہیں۔

برینٹ کروڈ فیوچرز 66.56 ڈالر فی بیرل پر تقریباً مستحکم رہے، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) کروڈ 62.29 ڈالر فی بیرل پر صرف 2 سینٹ اضافے کے ساتھ ٹریڈ ہوا۔

غزہ کی وزارتِ صحت کے مطابق اسرائیلی فضائی اور زمینی کارروائیوں میں شدت کے باعث غزہ شہر کے دو بڑے اسپتال آئوٹ آف سروس ہو گئے ہیں۔ اسرائیلی ٹینک غزہ کی پٹی کے اندر مزید پیش قدمی کر رہے ہیں۔ دوسری جانب، درجنوں عالمی رہنما اقوامِ متحدہ میں جمع ہوئے اور فلسطینی ریاست کو تسلیم کرنے کے حق میں آواز بلند کی، تاہم اسرائیل اور اس کے قریبی اتحادی امریکا نے اس کی سخت مخالفت کی۔

ادھر، یوکرین نے حالیہ ہفتوں میں روس کی توانائی تنصیبات پر ڈرون حملے تیز کر دیے ہیں، جن کا ہدف ریفائنریاں اور برآمدی ٹرمینلز ہیں۔ یورپی یونین نے امریکی صدر ڈونلڈ ٹرمپ کے دباؤ پر روسی ایل این جی کی درآمد پر پابندی ایک سال پہلے نافذ کرنے کا عندیہ دیا ہے، جو ماسکو کے خلاف پابندیوں کے 19ویں پیکج کا حصہ ہوگا۔

توانائی کے شعبے کے ماہر ڈینئیل ہائنز کے مطابق خام تیل کی قیمتیں نسبتاً غیر متحرک رہیں کیونکہ یورپی یونین کی روسی سپلائی پر پابندیوں کے اثرات مارکیٹ ہضم کر رہی ہے۔

دوسری جانب، نیٹو اتحادیوں نے روس پر ایسٹونیا اور پولینڈ کی فضائی حدود کی خلاف ورزی کا الزام لگایا ہے، جسے برطانیہ نے ممکنہ مسلح تصادم کے خطرے سے تعبیر کیا۔

عالمی منڈی کے دیگر اعداد و شمار کے مطابق، سعودی عرب کی خام تیل کی برآمدات جولائی میں چار ماہ کی کم ترین سطح پر پہنچ گئیں، جبکہ عراق نے اوپیک پلس معاہدے کے تحت اپنی برآمدات میں اضافہ کیا ہے۔