اسپین میں امریکا، چین مذاکرات: تجارتی تعلقات اور ٹیرف پر بات چیت

امریکا اور چین کے حکام نے اتوار کو اسپین کے دارالحکومت میڈرڈ میں اپنے تجارتی تعلقات پر جاری تناؤ اور ٹک ٹاک کی ڈیویسٹیچر ڈیڈ لائن سمیت اہم معاملات پر مذاکرات کا پہلا دن مکمل کرلیا۔

امریکی وفد کی قیادت وزیر خزانہ اسکاٹ بیسنٹ اور تجارتی نمائندہ جیمیسن گریئر نے کی، جبکہ چین کی نمائندگی نائب وزیراعظم ہی لیفینگ اور اعلیٰ تجارتی مذاکرات کار لی چنگ گینگ نے کی۔ بات چیت چھ گھنٹے جاری رہی اور پیر کی صبح دوبارہ شروع ہوگی۔

یہ چوتھی بار ہے کہ دونوں ممالک کے وفود نے چار ماہ میں یورپ کے مختلف شہروں میں ملاقات کی ہے تاکہ صدر ڈونلڈ ٹرمپ کی ٹیرف پالیسیوں کے بعد بگڑتے تعلقات کو کسی حد تک سنبھالا جا سکے۔ جولائی میں اسٹاک ہوم ملاقات کے دوران دونوں ممالک نے 90 روزہ تجارتی جنگ بندی پر اصولی اتفاق کیا تھا۔

ماہرین کے مطابق میڈرڈ مذاکرات میں کسی بڑے بریک تھرو کا امکان نہیں۔ غالب امکان ہے کہ مقبول ویڈیو ایپ ٹک ٹاک کے امریکی آپریشنز بیچنے کی ڈیڈ لائن، جو 17 ستمبر کو ختم ہورہی ہے، میں ایک اور توسیع کر دی جائے۔ یہ ٹرمپ کے عہدہ سنبھالنے کے بعد چوتھی توسیع ہوگی۔

ماہرین کا کہنا ہے کہ اصل پیش رفت تب ممکن ہوگی جب صدر ٹرمپ اور چینی صدر شی جن پنگ کی براہ راست ملاقات ہو، جس کا امکان اکتوبر میں سیول میں ایشیا پیسفک اکنامک کوآپریشن سمٹ کے موقع پر ظاہر کیا جا رہا ہے۔

امریکا نے مذاکرات کے ایجنڈے میں روسی تیل کے خریدار ممالک پر اضافی ٹیرف کا معاملہ بھی شامل کیا ہے۔ بیسنٹ نے جمعہ کو جی7 اتحادیوں پر زور دیا تھا کہ وہ چین اور بھارت سے آنے والی درآمدات پر ٹیرف عائد کریں تاکہ روس کو یوکرین جنگ ختم کرنے پر دباؤ ڈالا جا سکے۔

چینی وزارت تجارت نے کہا ہے کہ مذاکرات میں امریکی ٹیرف، ایکسپورٹ کنٹرولز کا غلط استعمال اور ٹک ٹاک جیسے معاملات زیر بحث آئیں گے۔