برکت فریزین ایگرو کا بڑا قدم، پولٹری فارمز اور فیڈ پلانٹ میں 690 ملین روپے کی سرمایہ کاری

برکت فریزین ایگرو لمیٹڈ (بی ایف ایگرو)، جو نیدرلینڈز کی فریزین ایگ گروپ اور پاکستان کے بُکش گروپ کے درمیان ایک مشترکہ منصوبہ ہے، نے اپنی سپلائی چین کو مضبوط بنانے، لاگت میں بچت کے اقدامات بڑھانے اور کوالٹی کنٹرول کو بہتر بنانے کے لیے ایک اسٹریٹجک بیک ورڈ انٹیگریشن منصوبے کی منظوری دے دی ہے۔

نئی لسٹڈ کمپنی نے یہ اطلاع اپنے اسٹیک ہولڈرز کو جمعہ کے روز پاکستان اسٹاک ایکسچینج کو دی۔

نوٹس میں کہا گیا کہ ہمیں یہ بتاتے ہوئے خوشی ہو رہی ہے کہ برکت فریزین ایگرو لمیٹڈ کے بورڈ آف ڈائریکٹرز نے 11 ستمبر 2025 کو منعقدہ اجلاس میں ایک اسٹریٹجک بیک ورڈ انٹیگریشن اقدام کی منظوری دی ہے، جس کا مقصد پولٹری لیئر فارمنگ اور فیڈ آپریشن کے قیام کے ذریعے خام مال کی سپلائی کو یقینی بنانا اور لاگت کی کارکردگی کو بہتر بنانا ہے۔

اس اقدام کے تحت کمپنی 690 ملین روپے کی سرمایہ کاری سے دو پولٹری فارمز قائم کرے گی، جن کی مجموعی گنجائش 225,000 پرندوں کی ہوگی۔

نوٹس کے مطابق یہ فارمز روزانہ تقریباً 200,000 انڈے پیدا کریں گے، جو کمپنی کی موجودہ یومیہ ضرورت (10 لاکھ انڈے) کا تقریباً 20 فیصد پورا کریں گے۔

پروجیکٹ میں ایک فیڈ پروسیسنگ سہولت کا قیام بھی شامل ہے جو اندرونی اور منتخب تیسرے فریق کی پولٹری آپریشنز کو سپورٹ کرے گی۔

ان میں سے ایک فارم مکمل طور پر برکت فریزین کی ملکیت ہوگا، جبکہ دوسرا فارم ایک تیسرے فریق کے ساتھ مشترکہ آپریشنل انتظام کے ذریعے قائم کیا جائے گا، تاہم کمپنی اپنی حیاتیاتی اثاثہ جات پر مکمل نگرانی رکھے گی۔

یہ منصوبہ قرض اور اندرونی وسائل کے امتزاج سے فنانس کیا جائے گا، اور 15 ماہ کے اندر کمرشل پروڈکشن شروع ہونے کی توقع ہے۔

اس سے قبل اپریل میں، برکت فریزین ایگرو لمیٹڈ نے 500 ملین روپے کی لاگت سے ڈرائیڈ ایگ پاؤڈر پروڈکشن سہولت قائم کرنے کا اعلان کیا تھا۔

برکت فریزین ایگرو لمیٹڈ نے 17 فروری 2025 کو ڈچ آکشن کے پہلے روز شیئرز کی فروخت کے ذریعے 1.23 ارب روپے جمع کیے، جب کمپنی نے 6 کروڑ 77 لاکھ 40 ہزار شیئرز فروخت کیے اور زیادہ سے زیادہ قیمت کی حد کو چھو لیا۔

2017 میں قائم ہونے والی برکت فریزین ایگرو لمیٹڈ، پیسٹورائزڈ انڈوں کی مصنوعات تیار کرنے میں مہارت رکھتی ہے، جن میں مکمل انڈے، زردیاں، سفیدی اور دیگر ڈیریویٹیوز شامل ہیں۔ یہ مصنوعات خاص طور پرہوٹل، ریسٹورنٹ اور کیفے سیکٹر، ساس اور مایونیز انڈسٹری، بیکنگ اور کنفیکشنری مارکیٹ کو فراہم کی جاتی ہیں۔