وزیرِاعظم کی جاپانی سرمایہ کاروں کو ہر ممکن سہولت فراہم کرنیکی یقین دہانی

وزیرِاعظم شہباز شریف نے کہا ہے کہ حکومت جاپانی سرمایہ کاروں اور بینکوں کو ہر ممکن سہولت فراہم کرے گی اور غیر ملکی سرمایہ کاری کے لیے محفوظ اور مسابقتی ماحول یقینی بنایا جائے گا۔

وہ بدھ کو اسلام آباد میں جاپان بینک فار انٹرنیشنل کوآپریشن کے ڈائریکٹر جنرل مائننگ اینڈ میٹلز فنانس ڈپارٹمنٹ، تارو کاٹو سے ملاقات کر رہے تھے۔

وزیرِاعظم نے کہا کہ پاکستان جاپان کے ساتھ سفارتی اور اقتصادی تعاون کو قدر کی نگاہ سے دیکھتا ہے۔ دونوں ممالک صنعت و تجارت کے شعبے میں طویل عرصے سے مضبوط شراکت داری رکھتے ہیں اور اب اس تعاون کو مزید وسعت دینے کے لیے پُرعزم ہیں۔

وزیرِاعظم کے حوالے سے بتایا گیا کہ پاکستان جاپانی سرمایہ کاروں اور بینکوں کو سرمایہ کاری کے لیے ہر ممکن سہولت فراہم کرے گا۔

شہباز شریف نے کہا کہ پاکستان زراعت، آئی ٹی، ٹیکسٹائل اور دیگر شعبوں میں جاپانی تکنیکی جدت اور پیشہ ورانہ مہارت سے نمایاں طور پر فائدہ اٹھا سکتا ہے۔

انہوں نے بتایا کہ بین الاقوامی مالیاتی اداروں اور عالمی سرمایہ کاروں نے بھی پاکستان میں بڑے اقتصادی و ترقیاتی منصوبوں میں دلچسپی ظاہر کی ہے۔

شہباز شریف کا کہنا تھا کہ پاکستان کی کم لاگت لیبر مارکیٹ غیر ملکی سرمایہ کاروں کے لیے پرکشش اور مسابقتی ماحول فراہم کرتی ہے جبکہ حکومت سرمایہ کاروں اور سرمایہ کاری کے تحفظ کے لیے مکمل طور پر پرعزم ہے۔

دریں اثنا، تارو کاٹو نے پاکستانی حکومت اور عوام کی مہمان نوازی پر شکریہ ادا کرتے ہوئے بتایا کہ جاپانی سرمایہ کاروں اور بینکوں کی پاکستان میں معاشی منصوبوں میں دلچسپی بڑھ رہی ہے اور وہ باہمی تعاون کو مزید فروغ دینا چاہتے ہیں۔