ٹرمپ۔پیوٹن مذاکرات سے قبل زیلنسکی نے یورپی یونین اور نیٹو کی حمایت حاصل کرلی

یوکرین کے صدر ولادیمیر زیلنسکی کو اتوار کے روز یورپ اور نیٹو اتحاد کی سفارتی حمایت حاصل ہوئی، جب کہ رواں ہفتے روس۔امریکا سربراہی اجلاس ہونے جا رہا ہے، جس میں کییف کو خدشہ ہے کہ روسی صدر ولادیمیر پیوٹن اور امریکی صدر ڈونلڈ ٹرمپ جنگ کے خاتمے کی شرائط طے کرنے کی کوشش کر سکتے ہیں۔

ٹرمپ نے جمعہ کو اعلان کیا کہ وہ 15 اگست کو الاسکا میں پیوٹن سے ملاقات کریں گے۔ یوکرین کا کہنا ہے کہ کوئی بھی فیصلہ اس کی شمولیت کے بغیر ناقابل قبول ہوگا۔ برطانیہ، فرانس، جرمنی اور دیگر یورپی رہنماؤں نے زور دیا کہ کوئی بھی سفارتی حل یوکرین اور یورپ کے سلامتی مفادات کا تحفظ کرے۔

نیٹو کے سیکریٹری جنرل مارک روٹے نے کہا کہ اجلاس کا مقصد پیوٹن کی سنجیدگی جانچنا ہے، اور یہ یقینی بنانا ہے کہ یوکرین اپنے مستقبل کا فیصلہ خود کرے۔ روس اس وقت یوکرین کے تقریباً پانچواں حصے پر قابض ہے، جبکہ کریمیا سمیت کئی خطوں کا دعویٰ کر چکا ہے۔

روس نواز تجزیہ کار سرگئی مارکوف نے کہا کہ ممکنہ معاہدے میں زمینوں کا تبادلہ شامل ہو سکتا ہے، لیکن اس کی تفصیلات غیر واضح ہیں۔ یوکرین اور یورپی ممالک کو خدشہ ہے کہ ٹرمپ، پیوٹن سے ایسا معاہدہ کر سکتے ہیں جو کییف کے لیے نقصان دہ ہو۔

زیلنسکی نے کہا کہ جنگ کا خاتمہ منصفانہ ہونا چاہیے اور یورپی اتحاد کے ساتھ مشترکہ مؤقف ہمارا سب سے بڑا اثاثہ ہے۔ امریکی نائب صدر جے ڈی وینس کے مطابق ممکنہ سمجھوتہ دونوں فریقین کو ناخوش کرے گا۔