پاکستان نے غزہ کیلئے امدادی سامان کی 18ویں کھیپ روانہ کردی

دفتر خارجہ نے بتایا کہ فلسطینی عوام کے ساتھ پاکستان کے غیر متزلزل عزم کے اظہار کے طور پر، پاکستان نے جمعہ کو غزہ کے لیے 18ویں انسانی ہمدردی کی امدادی کھیپ روانہ کی۔

دفتر خارجہ کے مطابق وفاقی وزیر اطلاعات و نشریات عطا اللہ تارڑ نے اسلام آباد انٹرنیشنل ایئرپورٹ پر منعقدہ ایک تقریب میں اس 18ویں امدادی کھیپ کی روانگی کی نگرانی کی۔

وزیر اعظم شہباز شریف کی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) نے متعلقہ شراکت داروں کے ساتھ قریبی تعاون میں اس کھیپ کی ترسیل کو ممکن بنایا۔ امدادی کھیپ میں ضروری اشیا بشمول خشک راشن پیک، فوری کھانے اور ادویات شامل تھیں۔

تقریب میں وزارتِ خارجہ اور این ڈی ایم اے کے سینیئر حکام کے علاوہ پاکستان میں فلسطین کے سفیر ڈاکٹر ظہیر زید نے بھی شرکت کی۔

اس کھیپ کے ساتھ پاکستان کی جانب سے غزہ کے لیے بھیجی گئی انسانی ہمدردی کی مجموعی امداد 18 کھیپوں پر مشتمل ہو گئی ہے، جن کا کل وزن 1,815 ٹن ہے۔ یہ مسلسل تعاون غزہ کے عوام کے ساتھ پاکستان کی پختہ یکجہتی کا مظہر ہے۔

یہ جاری کوشش خاص طور پر خواتین اور بچوں سمیت اُن شہریوں کی مشکلات کم کرنے کے لیے کی جا رہی ہے جو اس سنگین تنازع سے متاثر ہیں۔

دفتر خارجہ نے ایک بار پھر اس عزم کا اعادہ کیا کہ پاکستان ایک خودمختار، آزاد، قابلِ عمل اور جغرافیائی طور پر متصل فلسطینی ریاست کے قیام کی غیر متزلزل حمایت کرتا ہے، جو 1967 سے پہلے کی سرحدوں پر مبنی ہو اور اقوام متحدہ کی سلامتی کونسل کی قراردادوں کے مطابق اس کا دارالحکومت القدس الشریف ہو۔

واضح رہے کہ 3 اگست کو نائب وزیر اعظم و وزیر خارجہ سینیٹر محمد اسحاق ڈار نے غزہ کے لیے پاکستان کی 17ویں انسانی ہمدردی کی امدادی کھیپ کی روانگی کی نگرانی کی تھی، جس میں 100 ٹن امدادی سامان شامل تھا، جن میں خوراک، فوری کھانے، دودھ کا پاؤڈر اور طبی سازوسامان شامل تھے۔