24 سرکاری ادارے 3 مراحل میں نجی شعبے کو منتقل کیے جائیں گے، وزیر نجکاری

وفاقی وزیر برائے نجکاری عبدالعلیم خان نے کہا ہے کہ وفاقی حکومت نے آئندہ پانچ سال میں تین مراحل میں 24 سرکاری اداروں (ایس او ایز) کی نجکاری کا فیصلہ کیا ہے۔ جمعرات کو قومی اسمبلی میں ایک سوال کے تحریری جواب میں وفاقی وزیر نے ایوان کے سامنے نجکاری کا تفصیلی روڈ میپ پیش کیا۔

انہوں نے بتایا کہ منصوبے کے مطابق پہلے سال میں 10 اداروں کی نجکاری کی جائے گی، جس کے بعد اگلے ایک سے تین سالوں میں مزید 13 ادارے نجی شعبے کو منتقل کیے جائیں گے، جبکہ ایک ادارے کی نجکاری میں تین سے پانچ سال لگ سکتے ہیں۔

پہلے مرحلے میں پاکستان انٹرنیشنل ایئر لائنز (پی آئی اے)، روزویلٹ ہوٹل، زرعی ترقیاتی بینک لمیٹڈ (زیڈ ٹی بی ایل)، پی آئی اے-آئی ایل (روزویلٹ ہوٹل نیویارک)، فرسٹ ویمن بینک لمیٹڈ ، ہاؤس بلڈنگ فنانس کارپوریشن، پاکستان انجینئرنگ کمپنی ، سندھ انجینئرنگ لمیٹڈ ، اسلام آباد الیکٹرک سپلائی کمپنی لمیٹڈ (آئیسکو) اور فیصل آباد الیکٹرک سپلائی کمپنی لمیٹڈ (فیسکو) شامل ہیں۔

انہوں نے مزید بتایا کہ دوسرے مرحلے میں 13 اداروں کی نجکاری ہوگی جن میں یوٹیلیٹی اسٹورز کارپوریشن، چار بجلی پیدا کرنے والی کمپنیاں (جنکوز)، گوجرانوالہ الیکٹرک پاور کمپنی لمیٹڈ (گیپکو)، پاکستان ری انشورنس کمپنی لمیٹڈ ، اسٹیٹ لائف انشورنس کارپوریشن ، جامشورو پاور کمپنی لمیٹڈ، سینٹرل پاور جنریشن کمپنی لمیٹڈ )، نادرن پاور جنریشن کمپنی لمیٹڈ ، لاکھڑا پاور جنریشن کمپنی لمیٹڈ ، لاہور الیکٹرک سپلائی کمپنی لمیٹڈ (لیسکو)، ملتان الیکٹرک پاور کمپنی لمیٹڈ (میپکو)، ہزارہ الیکٹرک سپلائی کمپنی لمیٹڈ (ہیزکو)، حیدرآباد الیکٹرک سپلائی کمپنی لمیٹڈ (حیسکو)، پشاور الیکٹرک سپلائی کمپنی لمیٹڈ (پیسکو) اور سکھر الیکٹرک پاور کمپنی لمیٹڈ (سپیکو) شامل ہیں۔

انہوں نے کہا کہ یہ اقدام حکومت کے وسیع تر اقتصادی اصلاحاتی ایجنڈے کا حصہ ہے جس کا مقصد کارکردگی میں بہتری اور خسارے والے عوامی اداروں کا مالی بوجھ کم کرنا ہے۔

ایک اور سوال کے تحریری جواب میں وزیر خزانہ و محصولات سینیٹر محمد اورنگزیب نے کہا کہ مالی سال 2025 میں مہنگائی کی اوسط شرح 4.5 فیصد رہی جو مالی سال 2024 کی 23.4 فیصد کی شرح سے نمایاں کمی ہے۔

انہوں نے بتایا کہ مالی سال 2026 کے جولائی میں مہنگائی 4.1 فیصد رہی جو گزشتہ سال کے اسی مہینے میں 11.1 فیصد تھی۔ ان کا کہنا تھا کہ حکومت نے مہنگائی پر قابو پانے اور اشیائے ضروریہ کی قیمتوں کو مستحکم رکھنے کے لیے انتظامی، پالیسی اور ریلیف اقدامات پر مشتمل جامع منصوبہ بنایا ہے۔

انہوں نے کہا کہ بجٹ26-2025 میں کم آمدنی والے خاندانوں کی مدد کے لیے سماجی بہبود کے پروگراموں کے لیے فنڈنگ میں اضافہ کیا گیا ہے۔ بینظیر انکم سپورٹ پروگرام (بی آئی ایس پی) کے لیے مجموعی طور پر 716 ارب روپے مختص کیے گئے ہیں جو گزشتہ سال کے مقابلے میں 21 فیصد زیادہ ہیں۔

کاپی رائٹ بزنس ریکارڈر، 2025