9 مئی واقعات، سپریم کورٹ نے عمران خان کی درخواست ضمانت پر سماعت ملتوی کردی

سپریم کورٹ آف پاکستان نے پاکستان تحریکِ انصاف (پی ٹی آئی) کے بانی عمران خان کی مئی 9 کے پرتشدد واقعات سے متعلق مقدمات میں ضمانت کی سماعت 12 اگست تک ملتوی کر دی ہے۔

آج نیوز کے مطابق چیف جسٹس آف پاکستان یحییٰ آفریدی کی سربراہی میں دو رکنی بینچ نے کیس کی سماعت کی، تاہم سماعت اس لیے مؤخر کر دی گئی کیونکہ پی ٹی آئی بانی کے مرکزی وکیل سلمان صفدر بیرونِ ملک تھے۔

ایڈووکیٹ سلمان اکرم راجہ نے سپریم کورٹ میں پیش ہو کر عدالت کو سلمان صفدر کی غیر موجودگی سے آگاہ کیا اور التوا کی درخواست دی۔ انہوں نے عدالت سے اگلے ہفتے کے لیے تاریخ دینے اور تمام فریقین کو فوری نوٹسز جاری کرنے کی استدعا کی، تاہم عدالت نے فوری نوٹسز جاری کرنے کی درخواست مسترد کرتے ہوئے سماعت 12 اگست تک ملتوی کر دی۔

لاہور کی انسدادِ دہشت گردی عدالت (اے ٹی سی) نے نومبر 2024 میں مئی 9 کے فسادات سے متعلق مقدمات میں پی ٹی آئی بانی کی ضمانت مسترد کر دی تھی۔ اس کے بعد عمران خان نے رواں سال جون میں لاہور ہائی کورٹ (ایل ایچ سی) سے رجوع کیا، مگر ہائی کورٹ نے بھی ان کی درخواست مسترد کر دی۔

اس پر سابق وزیرِاعظم نے گزشتہ ہفتے ضمانت مسترد ہونے کے خلاف سپریم کورٹ میں درخواست دائر کی تھی۔

دریں اثناء، سرگودھا کی انسدادِ دہشت گردی عدالت میں مئی 9، 2023 کو میانوالی جوڈیشل کمپلیکس پر حملے سے متعلق کیس کی سماعت ہوئی۔ عدالت نے اب تک کسی بھی ملزم کو گرفتار نہ کرنے پر میانوالی پولیس پر سخت برہمی کا اظہار کیا۔

گزشتہ روز عدالت نے مفرور ملزمان کے وارنٹ گرفتاری جاری کرتے ہوئے حکم دیا تھا کہ تمام افراد کو گرفتار کر کے عدالت میں پیش کیا جائے، تاہم پولیس تاحال کسی بھی ملزم کو عدالت میں پیش نہ کر سکی۔

عدالت نے پولیس کی کارکردگی پر تشویش کا اظہار کرتے ہوئے واضح کیا کہ آئندہ سماعت پر ہر صورت گرفتار ملزمان کو پیش کیا جائے، بصورت دیگر احکامات پر عملدرآمد نہ کرنے والے افسران کے خلاف کارروائی کی جائے گی۔