مصر سے غزہ کیلئے امدادی ٹرک روانہ، اسرائیل نے امدادی سامان کی فضائی ترسیل شروع کر دی

مصر سے غزہ کی جانب امدادی ٹرکوں کی آمدورفت اتوار کو شروع ہوگئی، مصری سرکاری چینل ’’القاہرہ نیوز‘‘ کے مطابق یہ پیش رفت کئی ماہ کی عالمی دباؤ اور امدادی اداروں کی بھوک پھیلنے سے متعلق وارننگز کے بعد ہوئی۔ درجنوں ٹرک کرم ابو سالم (کیرم شالوم) کراسنگ کے راستے جنوبی غزہ میں داخل ہوئے۔

اسرائیلی فوج نے ہفتے کو اعلان کیا تھا کہ غزہ میں امدادی سامان کی فضائی ترسیل شروع کردی گئی ہے اور انسانی بحران کم کرنے کے لیے مزید اقدامات کیے جا رہے ہیں۔ فوج کے مطابق اقوام متحدہ کے قافلوں کے محفوظ گزر کے لیے ’’انسانی راہداریوں‘‘ اور گنجان آباد علاقوں میں ’’انسانی وقفے‘‘ کا انتظام ہوگا۔ ابتدائی فضائی ترسیل میں آٹا، چینی اور ڈبہ بند خوراک کے سات پیلیٹس شامل ہیں۔ فلسطینی ذرائع نے شمالی غزہ میں امدادی سامان کے گرنے کی تصدیق کی۔

اقوام متحدہ اور امدادی اداروں کا کہنا ہے کہ اسرائیلی محاصرے اور شدید پابندیوں کے باعث 2.2 ملین آبادی والے غزہ میں بھوک عام ہے۔ مارچ میں اسرائیل نے تمام سپلائی بند کردی تھی، جو مئی میں محدود شرائط کے ساتھ بحال کی گئی۔ غزہ کی وزارت صحت کے مطابق جنگ کے آغاز سے اب تک 127 افراد، جن میں 85 بچے شامل ہیں، بھوک سے جاں بحق ہوچکے ہیں۔

ادھر امدادی بحری جہاز، جو اٹلی سے غزہ روانہ ہوا تھا، اسرائیلی بحریہ نے روک لیا۔ وزارتِ خارجہ کے مطابق جہاز کو اسرائیلی ساحل پر منتقل کیا جا رہا ہے اور تمام مسافر محفوظ ہیں۔

اسرائیل نے واضح کیا کہ فوجی کارروائیاں بدستور جاری ہیں۔ اس دوران ایک بجلی لائن کو ڈی سیلینیشن پلانٹ سے جوڑا گیا ہے، جو روزانہ 9 لاکھ افراد کو پانی فراہم کرے گا۔