ٹرمپ نے جاپان سے تجارتی معاہدہ کرلیا، ٹیرف میں کمی

امریکہ اور جاپان نے ایک اہم تجارتی معاہدہ کیا ہے جس کے تحت صدر ڈونلڈ ٹرمپ کی جانب سے جاپانی مصنوعات پر عائد کیے جانے والے بھاری ٹیرف کو کم کر دیا گیا ہے۔ اس معاہدے میں جاپان کی جانب سے امریکہ میں 550 ارب ڈالر کی سرمایہ کاری کا وعدہ شامل ہے۔

نئے معاہدے کے تحت جاپانی درآمدات پر ٹیرف کو مجوزہ 25 فیصد سے کم کرکے 15 فیصد کر دیا گیا ہے، جب کہ جاپانی آٹو موبائلز پر پہلے سے عائد 25 فیصد ٹیرف بھی 15 فیصد تک کم ہو گا۔ آٹو موبائلز جاپان کی امریکہ کو کل برآمدات کا ایک چوتھائی سے زیادہ ہیں۔

صدر ٹرمپ نے اسے ’’تاریخ کا سب سے بڑا تجارتی معاہدہ‘‘ قرار دیا، جب کہ جاپانی وزیرِاعظم ایشیبا نے کہا کہ یہ ان ممالک میں سب سے کم شرح ہے جو امریکہ کے ساتھ تجارتی سرپلس رکھتے ہیں۔ اس اعلان کے بعد جاپانی اسٹاک مارکیٹ میں تیزی دیکھی گئی، نکئی انڈیکس 2.6 فیصد بڑھ کر ایک سال کی بلند ترین سطح پر پہنچ گیا۔ ٹویوٹا کے حصص میں 11 فیصد سے زائد اضافہ ہوا، جب کہ ہونڈا اور نسان میں 8 فیصد سے زیادہ تیزی آئی۔

معاہدے سے امریکی آٹو مینوفیکچررز ناخوش ہیں، جن کا کہنا ہے کہ جاپانی گاڑیوں پر کم ٹیرف عائد کرنے سے مقامی صنعت اور مزدوروں کو نقصان پہنچے گا، خاص طور پر جب کینیڈا اور میکسیکو سے درآمدات پر اب بھی 25 فیصد ٹیرف لاگو ہے۔

2024 میں، امریکہ نے جاپان سے 55 ارب ڈالر سے زائد کی گاڑیاں اور پرزے درآمد کیے، جب کہ صرف 2 ارب ڈالر کی امریکی مصنوعات جاپانی مارکیٹ میں فروخت ہوئیں۔ دوطرفہ تجارت تقریباً 230 ارب ڈالر رہی، جس میں جاپان کو 70 ارب ڈالر کا تجارتی سرپلس حاصل ہوا۔

ٹرمپ انتظامیہ یکم اگست کی ڈیڈلائن سے قبل مزید تجارتی معاہدے مکمل کرنے کی کوشش میں ہے تاکہ نئی بھاری ٹیرف شرحوں سے بچا جا سکے۔