امریکی ڈالر کے مقابلے روپے کی قدر میں تنزلی

انٹربینک مارکیٹ میں منگل کو ڈالر کے مقابلے روپے کی قدر میں 0.01 فیصد کی کمی ریکارڈ کی گئی ۔

کاروبار کے اختتام پر ڈالر کے مقابلے روپیہ 2 پیسے کی تنزلی سے 284.97 پر بند ہوا۔

یاد رہے کہ پیر کو روپیہ 284.95 پر بند ہوا تھا۔

عالمی سطح پر منگل کو ڈالر نے ایک محدود دائرے میں تجارت کی جب کہ ہفتے کے آغاز میں اس میں عارضی کمی دیکھی گئی تھی۔ سرمایہ کاروں کی نظریں تجارتی مذاکرات میں کسی بھی پیش رفت پر مرکوز ہیں کیونکہ یکم اگست کی آخری تاریخ قریب ہے جس کے تحت ممالک کو امریکہ کے ساتھ معاہدے کرنے ہوں گے ورنہ سخت ٹیرف کا سامنا کرنا پڑسکتا ہے۔

ین نے زیادہ تر گزشتہ سیشن کے فوائد کو برقرار رکھا جو جاپان میں اختتام ہفتہ ہونے والے ایوانِ بالا کے انتخابات کے نتائج کے بعد سامنے آئے۔ نتائج وہی رہے جن کی پہلے سے قیمتوں میں عکاسی ہوچکی تھی۔ اب توجہ اس بات پر مرکوز ہے کہ ٹوکیو کتنی جلدی واشنگٹن کے ساتھ تجارتی معاہدہ طے کرسکتا ہے اور وزیر اعظم شیگیرو ایشیبا کے مستقبل پر جو قیادت کی کرسی پر فائز ہیں۔

جاپانی کرنسی جو پیر کو انتخابات کے نتائج کے بعد 1 فیصد بڑھی تھی منگل کی ابتدائی ایشیائی تجارت میں معمولی کمزوری کے ساتھ 147.65 پر ٹریڈ کررہی تھی۔

یکم اگست کی ٹیرف ڈیڈ لائن میں صرف چند دن باقی رہ گئے ہیں، اس موقع پر امریکی وزیر خزانہ اسکاٹ بیسنٹ نے پیر کے روز کہا کہ انتظامیہ کے لیے تجارتی معاہدوں کا معیار ان کے وقت سے زیادہ اہم ہے۔

جب اُن سے پوچھا گیا کہ آیا اُن ممالک کے لیے ڈیڈ لائن میں توسیع ممکن ہے جو واشنگٹن کے ساتھ تعمیری مذاکرات میں مصروف ہیں، تو اسکاٹ بیسنٹ نے کہا کہ اس بارے میں فیصلہ صدر ڈونلڈ ٹرمپ کریں گے۔

مختلف کرنسیوں کے مقابلے میں امریکی ڈالر منگل کو معمولی اضافہ کے ساتھ 97.94 پر پہنچ گیا جب کہ پیر کو اس میں 0.6 فیصد کی کمی واقع ہوئی تھی۔