26 جون سے بارشوں کے باعث حادثات میں 98 افراد جاں بحق، 185 زخمی ہوئے، این ڈی ایم اے

نیشنل ڈیزاسٹر مینجمنٹ اتھارٹی (این ڈی ایم اے) نے جمعہ کے روز بتایا ہے کہ 26 جون سے اب تک ملک بھر میں بارشوں سے متعلق مختلف حادثات میں کم از کم 98 افراد جاں بحق اور 185 زخمی ہو چکے ہیں۔

این ڈی ایم اے کی تازہ ترین روزانہ صورتحال رپورٹ کے مطابق گزشتہ 24 گھنٹوں کے دوران 8 افراد جاں بحق اور 27 زخمی ہوئے۔ ان تازہ اموات کا تعلق پنجاب، سندھ اور بلوچستان سے ہے۔ رپورٹ میں بتایا گیا ہے کہ مکانات گرنے، کرنٹ لگنے اور آسمانی بجلی گرنے جیسے واقعات اموات کی بنیادی وجوہات رہے۔

نیشنل ڈیزاسٹر مینجمنٹ اتھارٹی (این ڈی ایم اے) کے مطابق، پنجاب سب سے زیادہ متاثرہ صوبہ رہا، جہاں 37 افراد جاں بحق ہوئے، جن میں 20 بچے شامل تھے، جبکہ 103 افراد زخمی ہوئے۔ اس کے بعد خیبر پختونخوا میں 30 اموات اور 39 زخمی رپورٹ ہوئے، جبکہ سندھ میں 17 افراد جاں بحق اور 34 زخمی ہوئے۔ اموات کی بڑی وجوہات میں مکانات کا منہدم ہونا، آسمانی بجلی کا گرنا اور کرنٹ لگنے کے واقعات شامل ہیں۔

انسانی جانوں کے نقصان کے ساتھ ساتھ مون سون بارشوں نے انفرااسٹرکچر اور املاک کو بھی شدید متاثر کیا ہے۔ ملک بھر میں اب تک 397 مکانات متاثر ہوئے ہیں، جن میں 132 مکمل طور پر تباہ جبکہ 265 جزوی طور پر متاثر ہوئے ہیں۔ صرف گلگت بلتستان کے ضلع دیامر میں 26 مکانات کو نقصان پہنچنے کی اطلاع ہے۔

مون سون بارشوں کے باعث زرعی شعبہ بھی شدید متاثر ہوا ہے۔ رپورٹ کے مطابق 111 مویشی ہلاک ہو چکے ہیں، جن میں سب سے زیادہ سندھ میں 58، خیبر پختونخوا میں 43 اور پنجاب میں 7 مویشی شامل ہیں۔

ادھر متعلقہ حکام نے آئندہ دنوں میں مزید بارشوں کی پیش گوئی کرتے ہوئے نشیبی اور حساس علاقوں کے رہائشیوں کو محتاط رہنے کی ہدایت کی ہے۔

این ڈی ایم اے کا کہنا ہے کہ وہ صوبائی ڈیزاسٹر مینجمنٹ اتھارٹیز کے ساتھ قریبی رابطے میں ہے تاکہ امدادی کارروائیاں مؤثر انداز میں جاری رکھی جا سکیں اور متاثرہ علاقوں کو بروقت مدد فراہم کی جا سکے۔