وزیراعظم شہباز شریف کی ثناء میر کو آئی سی سی ہال آف فیم میں شامل ہونے پر مبارکباد

وزیراعظم شہباز شریف نے جمعہ کے روز پاکستان ویمن کرکٹ ٹیم کی سابق کپتان اور مایہ ناز کرکٹر ثناء میر سے ملاقات کی اور انہیں انٹرنیشنل کرکٹ کونسل (آئی سی سی) کے ہال آف فیم میں شامل ہونے پر دلی مبارکباد پیش کی ہے۔

وزیراعظم نے کھیل کے فروغ میں ثناء میر کی خدمات کو سراہتے ہوئے کہا کہ ان کی قیادت میں قومی خواتین کرکٹ ٹیم نے نمایاں کامیابیاں حاصل کیں اور پاکستان کا نام عالمی سطح پر روشن کیا۔

انہوں نے کہا کہ آپ نے ٹیم کی قیادت لگن اور پیشہ ورانہ انداز میں کی۔ آپ کی کامیابیاں پوری قوم کے لیے باعث فخر ہیں۔

وزیراعظم شہباز شریف نے اس موقع پر امید ظاہر کی کہ ثناء میر ملک میں ابھرتی ہوئی صلاحیتوں کی تربیت اور رہنمائی میں فعال کردار ادا کرتی رہیں گی۔

انہوں نے کہا کہ ہماری حکومت ہر کھیل میں میرٹ کی بنیاد پر ٹیلنٹ کے فروغ کے لیے پُرعزم ہے۔

وزیراعظم نے اس بات پر بھی زور دیا کہ کھیلوں، خصوصاً کرکٹ میں مرد و خواتین دونوں کو مساوی مواقع اور سہولیات فراہم کرنا حکومت کی اولین ترجیح ہے۔

ثناء میر نے وزیراعظم کی جانب سے پرتپاک استقبال پر شکریہ ادا کیا اور اس عزم کا اظہار کیا کہ وہ ورلڈ کرکٹ ایسوسی ایشن اور آئی سی سی سمیت عالمی سطح پر پاکستان کی نمائندگی موثر انداز میں جاری رکھیں گی۔

انہوں نے پاکستان میں کرکٹ، بالخصوص خواتین کرکٹ کے فروغ کے لیے تجاویز بھی پیش کیں اور امید ظاہر کی کہ حکومت اُبھرتے کھلاڑیوں کے لیے مواقع اور انفرااسٹرکچر کی توسیع کے لیے ٹھوس اقدامات کرے گی۔