سعودی عرب کو ایس آئی ایف سی کے فعال کردار سے آگاہ کردیا گیا

وزیر اعظم شہباز شریف نے پیر کو کہا کہ پاکستان اور سعودی عرب کے درمیان اقتصادی تعلقات ایک نئے دور میں داخل ہو گئے ہیں کیونکہ دونوں ممالک دو طرفہ تجارت کے حجم کو بڑھانے کے لیے ٹھوس اقدامات کرنے کے لیے تیار ہیں۔

وزیراعظم نے ورلڈ اکنامک فورم کے خصوصی اجلاس کے موقع پر سعودی وزیر تجارت ڈاکٹر ماجد بن عبداللہ القصابی سے ملاقات میں کہا کہ اسپیشل انویسٹمنٹ فیسیلیٹیشن کونسل (ایس آئی ایف سی)ملک میں غیر ملکی سرمایہ کاری کے فروغ اور سہولت فراہم کرنے میں اہم کردار ادا کر رہی ہے۔

سعودی وزیر نے وزیراعظم کو بتایا کہ سعودی ولی عہد اور وزیراعظم محمد بن سلمان کی ہدایت پر پاکستان میں تجارت اور سرمایہ کاری کو ترجیح دے رہے ہیں۔ انہوں نے مزید کہا کہ سعودی تاجروں اور سرمایہ کاروں کا ایک وفد جلد پاکستان کا دورہ کرے گا۔

سعودی وزیر نے کہا کہ ایک یا ڈیڑھ سال کے اندر دوطرفہ تعلقات کو نئی بلندی پر لے جانے کے اہداف مقرر کیے جا رہے ہیں۔

وزیراعظم شہباز شریف نے کہا کہ پاکستانی شہریوں نے سعودی عرب کی ترقی اور خوشحالی میں نمایاں کردار ادا کیا ہے۔

سعودی وزیر نے نوجوانوں اور نئی نسل میں پاک سعودی تعلقات کے بارے میں احترام کے جذبات کو مزید فروغ دینے کی ضرورت پر زور دیا۔

اجلاس میں وزیر خزانہ محمد اورنگزیب، وزیر تجارت جام کمال خان، وزیر اطلاعات عطا اللہ تارڑ، وزیر پیٹرولیم ڈاکٹر مصدق ملک اور وزیراعظم کے معاون خصوصی طارق فاطمی نے بھی شرکت کی۔