پی ایچ ایم اے کا ایس ایم ایز کیلئے 300 ارب روپے کی برآمدی فنانسنگ مختص کرنے کے فیصلے کا خیرمقدم

پاکستان ہوزری مینوفیکچررز اینڈ ایکسپورٹرز ایسوسی ایشن (پی ایچ ایم اے) نے مالی سال 2026-27 کے لیے پاک ایگزم کے زیرِ انتظام ایکسپورٹ فنانس اسکیم (ای-ایف ایس) کے تحت چھوٹے اور درمیانے درجے کے کاروباری اداروں (ایس ایم ایز) کے لیے خصوصی طور پر 300 ارب روپے مختص کرنے کے حکومتی فیصلے کا خیرمقدم کیا ہے۔

پی ایچ ایم اے کے چیئرمین سید ضیا علمدار حسین نے کہا کہ یہ فیصلہ ایس ایم ایز کے شعبے کو مضبوط بنانے، سستے قرضوں تک رسائی بہتر بنانے اور برآمدات پر مبنی معاشی ترقی کو فروغ دینے کے حکومتی عزم کا عکاس ہے۔

انہوں نے وزیراعظم شہباز شریف کے وژن اور قائدانہ صلاحیتوں کو بھی سراہا۔

انہوں نے اس اقدام کے ذریعے ایس ایم ایز سے وابستہ برآمد کنندگان کی معاونت کے لیے وفاقی وزیر برائے خزانہ و محصولات سینیٹر محمد اورنگزیب، وزارتِ خزانہ اور پاک ایگزم بینک کی کوششوں کو بھی سراہا۔ پی ایچ ایم اے کے چیئرمین نے کہا کہ سستے ورکنگ کیپیٹل (کاروباری ضروریات کے لیے درکار سرمایہ) تک رسائی طویل عرصے سے چھوٹے اور درمیانے درجے کے برآمد کنندگان کے لیے بڑے چیلنجز میں سے ایک رہی ہے، بالخصوص ان کاروباری اداروں کے لیے جو اپنی پیداواری صلاحیت بڑھانے، برآمدات کے نئے آرڈرز حاصل کرنے اور عالمی منڈیوں میں مقابلہ کرنے کے خواہاں ہیں۔

انہوں نے کہا کہ 300 ارب روپے کی پوری مختص رقم اہل ایس ایم ایز کے لیے مخصوص کرنے سے انہیں مالی معاونت تک براہِ راست رسائی حاصل ہوگی اور عالمی منڈیوں میں ان کی مسابقتی صلاحیت بہتر بنانے میں مدد ملے گی۔

انہوں نے مزید کہا کہ ایس ایم ایز پاکستان کے صنعتی اور برآمدی نظام کا ایک اہم حصہ ہیں جو روزگار کے مواقع پیدا کرنے، صنعتی تنوع، کاروباری سرگرمیوں کے فروغ اور پائیدار معاشی ترقی میں اہم کردار ادا کرتے ہیں۔

سید ضیا علمدار حسین نے پاکستان کی ٹیکسٹائل، ہوزری اور نِٹ ویئر کی برآمدات کے فروغ اور عالمی منڈیوں میں ملک کی پوزیشن مستحکم بنانے کیلئے حکومت اور متعلقہ اداروں کے ساتھ قریبی تعاون جاری رکھنے کے پی ایچ ایم اے کے عزم کا اعادہ کیا۔