بڑی تنظیمی تبدیلیاں، ایف بی آر نے ٹیکس محکمے علیحدہ کر دیے

فیڈرل بورڈ آف ریونیو (ایف بی آر) نے اصلاحات، ٹیکسوں کے انضمام اور ہم آہنگی کے بنیادی مقاصد کے برعکس سیلز ٹیکس/وفاقی ایکسائز ڈیوٹی اور انکم ٹیکس کے شعبوں کو ایک دوسرے سے الگ کردیا ہے۔

اس سلسلے میں ایف بی آر نے جمعہ کو ان لینڈ ریونیو سروس کے 54 افسران (بی ایس 17 سے بی ایس 21) کے تبادلے اور تعیناتی کے احکامات جاری کیے اور انہیں نئی تخلیق کردہ اسامی ممبر، سیلز ٹیکس و فیڈرل ایکسائز ڈیوٹی (ٹیکنیکل) پر تعینات کیا۔

جنوری 2027 سے ٹیکس دہندگان کو سیلز ٹیکس اور انکم ٹیکس کے لیے الگ الگ کمشنرز سے رجوع کرنا پڑے گا۔ اس طرح کاروباری برادری کو تین مختلف محکموں، یعنی سیلز ٹیکس، انکم ٹیکس اور کسٹمز ڈیپارٹمنٹ کے چکر لگانا ہوں گے، جو ٹیکس دہندگان کے لیے ایک بڑی پریشانی اور تباہ کن صورتحال ثابت ہوگی۔

ڈاکٹر محمد سرمد قریشی (ان لینڈ ریونیو سروس/بی ایس 21) کو ممبر، سیلز ٹیکس و فیڈرل ایکسائز ڈیوٹی (ٹیکنیکل) کے نئے عہدے پر تعینات کردیا گیا ہے۔

ایف بی آر کے اس نئے رپورٹنگ نظام کے تحت ادارے کے تنظیمی ڈھانچے میں بھی تبدیلیاں کی گئی ہیں۔

ذرائع کے مطابق ایف بی آر کے بورڈ اِن کونسل نے فیڈرل بورڈ آف ریونیو (ہیڈکوارٹرز)، اسلام آباد میں ممبر، سیلز ٹیکس و فیڈرل ایکسائز ڈیوٹی (ٹیکنیکل) کی نئی اسامی تخلیق کرنے کی منظوری دے دی تھی۔

تاہم اس خبر کی اشاعت تک ایف بی آر نے ممبر، انکم ٹیکس (ٹیکنیکل)، فیڈرل بورڈ آف ریونیو (ہیڈکوارٹرز)، اسلام آباد کی اسامی سے متعلق کوئی نوٹیفکیشن جاری نہیں کیا تھا۔

بظاہر اس کا مطلب یہ ہے کہ ٹیکس دہندگان کے انکم ٹیکس سے متعلق معاملات بدستور ایف بی آر کے ممبر ان لینڈ ریونیو (آپریشنز) کے زیرِ نگرانی نمٹائے جاتے رہیں گے جبکہ ایف بی آر کے فیلڈ دفاتر میں سیلز ٹیکس کے لیے الگ زونز قائم کیے جائیں گے۔

ٹیکس شعبے سے تعلق رکھنے والے ممتاز ماہرین نے بزنس ریکارڈر کو بتایا کہ اگر ممبر، سیلز ٹیکس و فیڈرل ایکسائز ڈیوٹی (ٹیکنیکل) براہِ راست چیئرمین ایف بی آر کو رپورٹ کریں گے تو یہ سوال پیدا ہوتا ہے کہ چیف کمشنرز کس کو رپورٹ کریں گے؟ آیا وہ چیئرمین ایف بی آر کو جواب دہ ہوں گے یا ممبر ان لینڈ ریونیو (آپریشنز) کو؟

ٹیکس ماہرین نے سوال اٹھایا ہے کہ اگر انکم ٹیکس دہندگان کے معاملات بدستور ایف بی آر کے ممبر ان لینڈ ریونیو (آپریشنز) کے زیرِ نگرانی ہی رہیں گے تو پھر سیلز ٹیکس کے امور کو انکم ٹیکس کے محکمے سے الگ کرنے کا جواز کیا ہے؟

ٹیکس ماہرین کے مطابق سیلز ٹیکس اور انکم ٹیکس کے محکموں کو الگ کرنا ٹیکس دہندگان کے لیے ایک بڑا دھچکا ثابت ہوگا، کیونکہ اب انہیں الگ الگ کمشنرز اور ممبران سے رجوع کرنا پڑے گا جس سے ایف بی آر کے فیلڈ دفاتر میں ان کے کام کاج مزید پیچیدہ ہوجائیں گے۔

ٹیکس نظام کے اس نئے مخلوط ڈھانچے کے نتیجے میں ٹیکس دہندگان کے انکم ٹیکس اور سیلز ٹیکس سے متعلق مقدمات اور کیسز کی بڑے پیمانے پر ازسرِنو تقسیم اور منتقلی کرنا پڑے گی۔ یہ اصلاحات کے منافی اقدام فیلڈ دفاتر میں ٹیکس دہندگان کے انکم ٹیکس اور سیلز ٹیکس سے متعلق امور کو ایک دوسرے سے الگ کر دے گا۔بظاہر ایف بی آر کے نئے تنظیمی ڈھانچے کے تحت ٹیکس دہندگان کا انکم ٹیکس اور سیلز ٹیکس کا ریکارڈ بھی الگ الگ کردیا گیا ہے۔

وفاقی حکومت اور صوبے ٹیکسوں کو ایک چھت تلے لانے، ان کے انضمام اور مشترکہ نظام کے تحت چلانے کی جانب پیش رفت کر رہے ہیں، لیکن اس کے برعکس فیڈرل بورڈ آف ریونیو (ایف بی آر) ہیڈکوارٹرز، اسلام آباد میں ممبر، سیلز ٹیکس و فیڈرل ایکسائز ڈیوٹی (ٹیکنیکل) کی نئی اسامی تخلیق کردی گئی ہے۔

اس نئی تبدیلی کے باعث سب سے زیادہ مشکلات ٹیکس دہندگان کو پیش آئیں گی، کیونکہ اب انہیں انکم ٹیکس اور سیلز ٹیکس سے متعلق معاملات نمٹانے کے لیے الگ الگ ٹیکس افسران اور دفاتر سے رجوع کرنا پڑے گا۔

ٹیکس ماہرین نے چیئرمین ایف بی آر سے مطالبہ کیا ہے کہ وہ ممبر، سیلز ٹیکس و فیڈرل ایکسائز ڈیوٹی (ٹیکنیکل) کے اختیارات اور ذمہ داریوں کے ساتھ ساتھ ممبر ان لینڈ ریونیو (آپریشنز) کے باقی ماندہ اختیارات اور دائرۂ کار کے بارے میں بھی تفصیلی وضاحت جاری کریں، تاکہ ٹیکس دہندگان کی رہنمائی ہو سکے اور اس حوالے سے پائی جانے والی الجھن دور کی جا سکے۔