وزیراعظم کی زیر صدارت خیبرپختونخوا میں سیکیورٹی صورتحال کا جائزہ لینے کے لیے ایپکس کمیٹی کا اجلاس
- وفاقی، صوبائی اور عسکری قیادت کے اجلاس میں سیکیورٹی اور انسدادِ دہشت گردی کے اقدامات پر تبادلۂ خیال کیا گیا۔
وزیراعظم شہباز شریف نے گورنر ہاؤس خیبرپختونخوا میں ایپکس کمیٹی کے اہم اجلاس کی صدارت کی۔ یہ اطلاع سرکاری خبر رساں ادارے ریڈیو پاکستان نے سیکیورٹی ذرائع کے حوالے سے دی۔
ذرائع کے مطابق اجلاس میں گورنر خیبرپختونخوا فیصل کریم کنڈی، وفاقی و صوبائی وزرا اور متعلقہ حکام شریک ہیں۔ اعلیٰ عسکری قیادت بھی اجلاس میں شرکت کر رہی ہے۔
اجلاس میں نائب وزیراعظم اسحاق ڈار، چیف آف ڈیفنس فورسز فیلڈ مارشل عاصم منیر اور وفاقی وزیر برائے منصوبہ بندی و ترقی احسن اقبال بھی شریک ہیں۔
ذرائع نے بتایا کہ اجلاس میں خیبرپختونخوا کی مجموعی سیکیورٹی صورتحال اور دہشت گردی کے خلاف کیے جانے والے اقدامات کا جائزہ لیا جا رہا ہے۔
یہ پیش رفت وفاقی حکومت کی جانب سے خیبرپختونخوا میں ایمرجنسی نافذ کیے جانے کے چند ہفتے بعد سامنے آئی ہے۔ صدر مملکت آصف علی زرداری نے انسدادِ دہشت گردی کے اقدامات پر وفاق اور صوبے کے درمیان اختلافات کے تناظر میں وفاقی کابینہ کی سفارش کی منظوری دی تھی۔
صدر مملکت کے دفتر کے مطابق یہ اقدامات آئین کے آرٹیکل 232 اور 234 کے تحت منظور کیے گئے تھے۔
Comments