فیول ریلیف اسکیم، پٹرول سبسڈی کیسے حاصل کی جائے؟

وزیراعظم شہباز شریف نے مشرق وسطیٰ میں کشیدگی کے باعث عالمی سطح پر تیل کی قیمتوں میں اضافے کے درمیان موٹر سائیکل، رکشہ، چنگ چی اور چھوٹی گاڑیوں کے صارفین کو پٹرول کی بڑھتی ہوئی قیمتوں کے اثرات سے تحفظ دینے کے لیے خصوصی فیول ریلیف اسکیم کا اعلان کردیا ہے۔

اسکیم کے تحت موٹر سائیکل، رکشہ، چنگ چی اور دیگر دو اور تین پہیوں والی گاڑیوں کے اہل صارفین کو ماہانہ 20 لیٹر تک پٹرول پر فی لیٹر 100 روپے کا ریلیف دیا جائے گا، جس کے نتیجے میں انہیں ماہانہ 2,000 روپے تک کی بچت ہوگی۔

800 سی سی تک انجن رکھنے والی گاڑیوں کے مالکان بھی ماہانہ 30 لیٹر تک پٹرول پر فی لیٹر 100 روپے کے اسی ریلیف کے اہل ہوں گے، جس سے انہیں ماہانہ 3,000 روپے تک کی بچت ہوگی۔

حکومت کی جانب سے وزیراعظم فیول ریلیف پروگرام کے لیے خصوصی طور پر مختص ویب سائٹ پر دستیاب معلوماتی مواد کے مطابق اس اسکیم میں سوزوکی مہران، آلٹو اور بولان جیسی چھوٹی گاڑیاں شامل ہیں۔

کون اہل ہے؟

موٹر سائیکل، رکشہ اور دیگر دو اور تین پہیوں والی گاڑیوں کے صارفین ماہانہ 20 لیٹر تک پٹرول پر ریلیف کے اہل ہوں گے۔

800 سی سی تک انجن رکھنے والی گاڑیوں کے مالکان کو ماہانہ 30 لیٹر تک پٹرول پر ریلیف دیا جائے گا۔

حکومت اسکیم کے تحت فی لیٹر 100 روپے کا ریلیف فراہم کرے گی۔

دو اور تین پہیوں والی گاڑیوں کے لیے زیادہ سے زیادہ ماہانہ ریلیف 2,000 روپے جبکہ اہل چھوٹی گاڑیوں کے لیے 3,000 روپے ہوگا۔

رجسٹریشن کیسے کی جائے گی؟

درخواست گزاروں کے پاس درست شناختی کارڈ، اپنے نام پر رجسٹرڈ سم اور متعلقہ صوبائی ایکسائز ڈیپارٹمنٹ کے ریکارڈ کے ذریعے تصدیق شدہ گاڑی کی رجسٹریشن کی تفصیلات ہونا ضروری ہے۔

رجسٹریشن کا عمل ایس ایم ایس کے ذریعے ہوگا:

مرحلہ 1 — رجسٹریشن:

9771 پر درج ذیل فارمیٹ میں ایس ایم ایس بھیجیں:

REG شناختی کارڈ نمبر پلیٹ نمبر صوبے کا کوڈ رجسٹریشن کی تاریخ

گاڑی کی رجسٹریشن کی تاریخ دن، ماہ اور سال کی ترتیب میں DDMMYYYY فارمیٹ میں درج کرنا ہوگی۔

صوبوں اور علاقوں کے کوڈ یہ ہیں:

I — اسلام آباد

A — آزاد جموں و کشمیر

G — گلگت بلتستان

S — سندھ

P — پنجاب

K — خیبر پختونخوا

B — بلوچستان

کامیاب رجسٹریشن کے بعد درخواست گزاروں کو تصدیقی پیغام موصول ہوگا۔

مرحلہ 2 — ٹوکن حاصل کریں:

پٹرول اسٹیشن جانے سے پہلے 9771 پر TOK لکھ کر ایس ایم ایس بھیجیں تاکہ فیول ریلیف ٹوکن حاصل کیا جاسکے۔

مرحلہ 3 — رعایتی پٹرول خریدیں:

پٹرول اسٹیشن پر ایس ایم ایس ٹوکن دکھائیں تاکہ رعایتی قیمت پر پٹرول حاصل کیا جاسکے۔ اہل ماہانہ کوٹے کے مطابق فی لیٹر 100 روپے کا ریلیف لاگو ہوگا۔

اسکیم کب شروع ہوگی؟

اسکیم اسلام آباد میں 14 اور 15 ستمبر کی درمیانی شب 12 بجے سے شروع ہوگی۔

اسے آزاد جموں و کشمیر اور گلگت بلتستان سمیت پورے پاکستان میں 16 اور 17 ستمبر کی درمیانی شب 12 بجے سے نافذ کیا جائے گا۔

اسکیم کے لیے رجسٹریشن اتوار کو شروع کردی گئی، جبکہ حکومت نے کہا ہے کہ مزید تفصیلات آگاہی مہم کے ذریعے فراہم کی جائیں گی۔

مندرجہ بالا خبر بزنس ریکارڈر (ڈیجیٹل) کے شعبہ سیاست کے سربراہ بصیر احمد کی جانب سے فراہم کی گئی ہے۔