زاپوریژیا جوہری پلانٹ کے قریب ایندھن ٹرکوں پر حملہ، روس کا یوکرین پر الزام

روس کی سرکاری جوہری توانائی کارپوریشن کے سربراہ الیکسی لیخاچیوف نے اتوار کو یوکرین پر ڈیزل ایندھن لے جانے والے ٹرکوں پر حملے کا الزام عائد کیا ہے، جس میں 2 روسی فوجی ہلاک اور متعدد زخمی ہوئے۔

لیخاچیوف کے مطابق حملہ جمعہ کو کیا گیا اور اس کا مقصد روس کے زیر قبضہ زاپوریژیا جوہری بجلی گھر کی سلامتی کو جان بوجھ کر خطرے میں ڈالنا تھا۔ یورپ کے سب سے بڑے اس جوہری پلانٹ میں 6 ری ایکٹرز ہیں اور روسی فورسز نے فروری 2022 میں یوکرین جنگ کے ابتدائی ہفتوں کے دوران اس پر قبضہ کر لیا تھا۔

انہوں نے کہا کہ یوکرینی فورسز نے ڈیزل ٹرکوں پر متعدد حملے کیے، جو پلانٹ کو ایندھن فراہم کرتے ہیں، جبکہ حملے پلانٹ کے احاطے کی حدود کے قریب ہوئے۔

زاپوریژیا پلانٹ میں بیرونی بجلی کی فراہمی منقطع ہونے کی صورت میں ڈیزل جنریٹرز ری ایکٹرز کے ایندھن کو ٹھنڈا رکھنے کے لیے بجلی فراہم کرتے ہیں۔ بین الاقوامی جوہری توانائی ایجنسی نے پلانٹ پر مستقل مبصر ٹیم تعینات کر رکھی ہے۔