لائف لائن کو ہتھیار بنانا

بشکیک میں شنگھائی تعاون تنظیم کے سربراہی اجلاس سے خطاب کرتے ہوئے وزیراعظم شہباز شریف کے یہ ریمارکس کہ پانی کو کبھی بھی ہتھیار نہیں بنایا جانا چاہیے اور نہ ہی اسے دباؤ ڈالنے کے آلے کے طور پر استعمال کیا جانا چاہیے، توجہ اور غیر مبہم اتفاقِ رائے کا مستحق ہے۔

ان کا یہ انتباہ ایسے وقت میں سامنے آیا ہے جب مشترکہ آبی وسائل کا انتظام علاقائی سلامتی کا ایک تیزی سے بڑھتا ہوا اہم پہلو بنتا جارہا ہے، بالخصوص بھارت کی جانب سے 2025 میں سندھ طاس معاہدے کو معطل رکھنے کے فیصلے کے بعد۔

مستقل ثالثی عدالت کی جانب سے ایک روز قبل دیا گیا یہ فیصلہ کہ معاہدہ بدستور نافذ العمل ہے، اس بنیادی اصول کو تقویت دیتا ہے کہ ایسی ذمہ داریوں کو سیاسی سہولت کے مطابق ترک نہیں کیا جاسکتا۔

یہاں بنیادی مسئلہ، جس پر توجہ دینا ضروری ہے، یہ انتہائی تشویشناک تصور ہے کہ پانی پر اختیار کو سیاسی دباؤ کے ایک ذریعے کے طور پر استعمال کیا جاسکتا ہے۔ جیسا کہ وزیراعظم نے کہا، پانی خطے کی زندگی کی شہ رگ ہے۔

درحقیقت یہ اصول اس سے بھی کہیں وسیع ہے، پانی انسانی وجود کی زندگی کی شہ رگ ہے۔ یہ زراعت، ماحولیاتی نظام، صنعت اور آبادیوں کو برقرار رکھتا ہے اور اس کی دستیابی اس بات کا تعین کرتی ہے کہ معاشرے ترقی کریں گے یا زندہ رہنے کے لیے جدوجہد کریں گے۔

لہٰذا کسی ریاست کی جانب سے بین الاقوامی طور پر مشترکہ آبی وسائل کے بہاؤ کو معاہداتی ذمہ داریوں کی خلاف ورزی کرتے ہوئے روکنے یا اس میں دانستہ ردوبدل کرنے کی کوئی بھی کوشش، ایک عام سفارتی تنازع سے کہیں زیادہ سنگین نتائج کی حامل ہوتی ہے۔

یہی وجہ ہے کہ اسلام آباد کی جانب سے بھارت کے اقدام کو جنگی اقدام قرار دینا مکمل طور پر جائز ہے۔ سندھ طاس معاہدے کو معطل رکھنے کے اپنے فیصلے کا اعلان کرنے کے بعد سے نئی دہلی نے زرعی چکر کے اہم مراحل میں پاکستان کی جانب آنے والے دریاؤں کے بہاؤ کے حوالے سے شدید غیر یقینی پیدا کردی ہے، جبکہ اس نے ان مغربی دریاؤں پر پن بجلی کے منصوبوں کی بھی منظوری دی ہے جو معاہدے کے تحت پاکستان کے لیے مختص ہیں۔

ایک ایسے ملک کے لیے جہاں پانی کی قلت پہلے ہی ایک بڑا مسئلہ ہے اور جس کی معیشت کا انحصار بڑی حد تک دریائے سندھ کے نظام پر ہے، یہ واضح طور پر ایک وجودی تشویش ہے، جس کے ممکنہ نقصانات زراعت سے کہیں آگے تک پھیل سکتے ہیں۔ پاکستان کی زراعت لاکھوں افراد کے روزگار کا ذریعہ ہے اور کھاد اور بیج کی منڈیوں سے لے کر خوراک کی پراسیسنگ، نقل و حمل اور دیہی تجارت تک معاشی سرگرمیوں کی ایک وسیع زنجیر کو سہارا دیتی ہے۔

پانی کی دستیابی میں نمایاں خلل پوری معیشت پر اثر انداز ہوسکتا ہے۔ زرعی پیداوار میں کمی سے کسانوں کی آمدنی کو خطرہ لاحق ہوگا، غذائی اشیا کی رسد محدود ہوگی اور قیمتوں میں اضافہ ہوگا، جبکہ کمزور پیداوار برآمدات اور زرعی خام مال پر انحصار کرنے والی صنعتوں کو نقصان پہنچا سکتی ہے۔

چنانچہ پانی کے عدم تحفظ کی صورتحال تیزی سے غذائی، روزگار اور معاشی عدم تحفظ میں تبدیل ہوسکتی ہے۔

تاہم یہ بات بھی پیش نظر رہنی چاہیے کہ اس معاملے کے اثرات صرف پاکستان کی آبی اور معاشی سلامتی تک محدود نہیں رہیں گے۔ پورے ہمالیائی خطے کا نازک ماحولیاتی توازن بھی خطرے میں پڑ جائے گا۔

ہمالیہ سے نکلنے والے دریا ایک باہم مربوط ماحولیاتی نظام تشکیل دیتے ہیں۔ دریاؤں کے بہاؤ میں مصنوعی تبدیلیاں اور نازک پہاڑی ماحول میں مداخلت میں تیزی پورے خطے کے ماحولیاتی نظام اور آبادیوں کے لیے نتائج پیدا کرسکتی ہے، یہ صرف پاکستان کے لیے نہیں ہوگا۔

ایک ایسے وقت میں جب موسمیاتی تبدیلی پہلے ہی گلیشیئرز کے پگھلاؤ، سیلاب، خشک سالی اور شدید موسمی حالات میں اضافہ کررہی ہے، جیسا کہ نیپال میں حالیہ سیلابوں نے المناک طور پر ثابت کیا ہے، ان نظاموں میں مزید خلل لاکھوں افراد کے لیے خطرات کو کئی گنا بڑھا سکتا ہے۔

لہٰذا یہاں بنیادی اصولوں کے حوالے سے کسی قسم کا ابہام نہیں ہونا چاہیے: مشترکہ پانیوں کو منظم کرنے والے بین الاقوامی معاہدے ایسے اختیاری انتظامات نہیں ہیں جنہیں سہولت کے وقت اختیار کیا جائے اور حالات بدلنے پر ترک کردیا جائے؛ اور پانی کو محض اس لیے جغرافیائی سیاسی ہتھیار نہیں سمجھا جاسکتا کہ ایک ملک کو بالائی علاقوں سے آنے والے دریاؤں کے بہاؤ پر اختیار حاصل ہے۔

آبادیوں کو کسی بنیادی ضرورت کے وسائل تک رسائی سے محروم کرنے کی دانستہ کوشش ایک انتہائی خطرناک اخلاقی حد کو عبور کرتی ہے، اور جب یہ بین الاقوامی ذمہ داریوں کی خلاف ورزی کرتی ہو اور شہریوں کو شدید نقصان پہنچاتی ہو تو بین الاقوامی قانون کے تحت سنگین سوالات اٹھتے ہیں۔

پاکستان کو سفارتی اور قانونی ذرائع کے ذریعے اپنے معاہداتی حقوق کا دفاع جاری رکھنا چاہیے، جبکہ اسے فوری طور پر اپنی پانی ذخیرہ کرنے، پانی کے تحفظ اور آبی انتظام کی صلاحیتوں کو بہتر بنانے کی ضرورت بھی ہے۔

لیکن عالمی برادری کو بھی وزیراعظم کی جانب سے بیان کردہ وسیع تر اصول کو تسلیم کرنا چاہیے: دریاؤں کو ہتھیار نہیں بننا چاہیے۔ ایک ایسی دنیا میں جہاں درجہ حرارت بڑھ رہا ہے اور پانی کی قلت میں مسلسل اضافہ ہورہا ہے، دریاؤں کو ہتھیار کے طور پر استعمال کرنا امن، انسانی جانوں اور پورے خطوں کے ماحولیاتی مستقبل کو خطرے میں ڈال سکتا ہے۔

کاپی رائٹ بزنس ریکارڈر، 2026