پاک سوزوکی کی جاپانی طرز کی منی گاڑیوں کی پہلی بار برونائی کو برآمد

پاکستان کی آٹو صنعت نے برآمدات کے میدان میں اہم کامیابی حاصل کرلی، سوزوکی نے برونائی میں اپنی پاکستانی ذیلی کمپنی پاک سوزوکی موٹر کمپنی کے تیار کردہ آلٹو اور ایوری ماڈلز متعارف کرادیے۔

27 اگست کو اعلان کردہ اس پیشرفت کے حوالے سے جاپانی آٹو کمپنی نے اپنے بیان میں کہا کہ یہ پہلا موقع ہے جب سوزوکی نے کسی بیرونِ ملک پیداواری مرکز سے ایسے ماڈلز برآمد کیے ہیں جن کا باڈی سائز اور انجن کی گنجائش جاپانی منی گاڑیوں کے برابر ہے۔

آلٹو اور ایوری ماڈلز کی لانچ کے ساتھ سوزوکی برونائی کی مارکیٹ میں اپنی گاڑیوں کی رینج کو وسعت دے رہی ہے۔ کمپنی نے مزید کہا کہ بوسٹیڈ نے سوزوکی موٹر سائیکلوں کی فروخت اور تقسیم کا کام بھی شروع کرنے کا اعلان کیا ہے جن کی فروخت 2026 کے موسمِ خزاں کے آس پاس شروع ہونے کا امکان ہے۔

پاک سوزوکی موٹر کمپنی (پی ایس ایم سی) کو اگست 1983 میں پاکستان میں پبلک لمیٹڈ کمپنی کے طور پر قائم کیا گیا جو پاکستان آٹوموبائل کارپوریشن لمیٹڈ اور جاپان کی سوزوکی موٹر کارپوریشن کے درمیان مشترکہ منصوبے کے طور پر وجود میں آئی۔ سوزوکی موٹر کارپوریشن اس کمپنی کی اکثریتی حصص دار ہے۔

یہ کمپنی سوزوکی گاڑیوں، پک اَپس، وینز، فور بائی فور گاڑیوں اور موٹر سائیکلوں کے ساتھ ان کے متعلقہ اسپیئر پارٹس کی مقامی اسمبلنگ، تیاری اور مارکیٹنگ کرتی ہے۔ سوزوکی برانڈ کا تعلق جاپان سے ہے۔ کمپنی نے پاکستان میں آٹو موبائل مارکیٹ کی بنیاد رکھنے میں اہم کردار ادا کیا اور طویل عرصے سے مارکیٹ میں قائدانہ پوزیشن برقرار رکھی جبکہ مسافر گاڑیوں کے شعبے میں اکثر اس کا مارکیٹ شیئر 50 فیصد سے زائد رہا ہے۔ کمپنی کو ملک بھر میں 100 سے زائد شہروں میں 175 ڈیلرشپس پر مشتمل سب سے بڑا ڈیلر نیٹ ورک رکھنے کا اعزاز بھی حاصل ہے۔

2023 میں پاک سوزوکی موٹر کمپنی کو نمایاں کاروباری مشکلات کا سامنا کرنا پڑا جن کی بنیادی وجہ اسٹیٹ بینک آف پاکستان کی جانب سے لیٹرز آف کریڈٹ (ایل سیز) کھولنے پر عائد درآمدی پابندیاں تھیں جس کے باعث خام مال اور دیگر ضروری سامان کی شدید قلت پیدا ہوگئی۔ نتیجتاً کمپنی کے آٹو موبائل اور موٹر سائیکل پلانٹس کو سال کے دوران متعدد بار پیداوار بند کرنا پڑی۔

2023 میں پاک سوزوکی موٹر کمپنی کے بورڈ آف ڈائریکٹرز نے پاکستان اسٹاک ایکسچینج سے رضاکارانہ طور پر ڈی لسٹ ہونے کا فیصلہ کیا۔ کمپنی نے اس فیصلے کی وجوہات میں 2019، 2020 اور 2022 میں مسلسل خسارے، 2019 کے بعد 2021 کے علاوہ کسی سال منافع نہ دینے اور حصص کی تاریخی طور پر کم قیمت کو قرار دیا۔

ڈی لسٹنگ کے باوجود سوزوکی موٹر کارپوریشن نے پاکستانی مارکیٹ سے اپنی دیرینہ وابستگی کا اعادہ کرتے ہوئے کہا کہ پاکستان عالمی سطح پر اس کی اہم ترین مارکیٹوں میں سے ایک ہے اور کمپنی یہاں سرمایہ کاری کا سلسلہ جاری رکھے گی۔