پیئری نے مونٹیری اوپن کے فائنل میں میرٹنز کو شکست دے کر پہلا ڈبلیو ٹی اے سنگلز ٹائٹل جیت لیا

فرانس کی ڈیان پیئری نے مونٹیری اوپن کے فائنل میں بیلجیئم کی سیکنڈ سیڈ ایلیس میرٹنز کو 6-4، 0-6، 6-3 سے شکست دے کر اپنے کیریئر کا پہلا ڈبلیو ٹی اے سنگلز ٹائٹل جیت لیا۔

23 سالہ پیئری نے ڈبلیو ٹی اے 500 ایونٹ کے ابتدائی سیٹ میں شاندار آغاز کرتے ہوئے 4-1 کی برتری حاصل کی، تاہم 30 سالہ میرٹنز نے واپسی کرتے ہوئے اسکور برابر کردیا۔ پیئری نے اگلا گیم جیتنے کے بعد میرٹنز کی سروس توڑ کر پہلا سیٹ 6-4 سے اپنے نام کیا۔

دوسرے سیٹ میں میرٹنز نے بھرپور انداز میں واپسی کی اور مسلسل چھ گیمز جیت کر سیٹ 6-0 سے اپنے نام کرلیا۔ پیئری نے 0-5 کے اسکور پر میڈیکل ٹائم آؤٹ بھی لیا، تاہم دوبارہ کورٹ میں آگئیں۔

فیصلہ کن سیٹ میں پیئری نے دوبارہ رفتار حاصل کی اور 5-1 کی برتری بنا لی۔ میرٹنز نے لگاتار دو گیمز جیت کر واپسی کی کوشش کی، تاہم پیئری نے مضبوط اعصاب کا مظاہرہ کرتے ہوئے سیٹ 6-3 سے جیت لیا۔

پیئری نے ڈھائی گھنٹے سے زائد جاری رہنے والے مقابلے میں پہلی بار ٹور لیول سنگلز ٹائٹل اپنے نام کیا۔ وہ پیر کو یو ایس اوپن میں سوئٹزرلینڈ کی وکٹوریجا گولوبک کے مدمقابل ہوں گی۔