حکومت کا پمز آتشزدگی کے متاثرہ خاندانوں کیلئے 50 لاکھ روپے امداد کا اعلان

وفاقی حکومت نے پاکستان انسٹی ٹیوٹ آف میڈیکل سائنسز (پمز) اسپتال میں حالیہ آتشزدگی کے دوران جاں بحق ہونے والے شیر خوار بچوں کے ہر خاندان کے لیے 50 لاکھ روپے مالی امداد کا اعلان کیا ہے۔

سرکاری خبر رساں ادارے اے پی پی کے مطابق مالی امداد کا مقصد سانحے کے بعد غمزدہ والدین کو کسی حد تک مدد اور دلاسہ فراہم کرنا ہے۔

حکومت نے تسلیم کیا کہ قیمتی انسانی جانوں کے نقصان کا کوئی مالی ازالہ ممکن نہیں۔

یہ اعلان پمز کے ایک وارڈ میں پیش آنے والی ہولناک آتشزدگی کے بعد کیا گیا ہے، جس میں کم از کم 14 شیر خوار بچے جاں بحق ہوئے۔

حکومت کا کہنا ہے کہ یہ مالی معاونت سوگوار خاندانوں کو فوری مشکلات کم کرنے میں مدد دینے کی مخلصانہ کوشش ہے۔

حکومت نے مزید یقین دہانی کرائی کہ واقعے کے بعد متاثرہ خاندانوں کو ہر ممکن تعاون اور مدد فراہم کرنے کا سلسلہ جاری رکھا جائے گا۔

بیان میں سانحے پر گہرے دکھ اور افسوس کا اظہار کرتے ہوئے جاں بحق بچوں کے خاندانوں سے یکجہتی کا اظہار بھی کیا گیا۔

حکام کے مطابق بدھ کو اسلام آباد کے ایک اسپتال کے زچہ و بچہ وارڈ میں آگ بھڑک اٹھی، جس کے نتیجے میں 14 شیر خوار بچے جاں بحق ہوگئے۔ پاکستانی حکام نے آگ لگنے کی وجہ خراب ایئر کنڈیشنر کو قرار دیا ہے۔

اسلام آباد ضلعی انتظامیہ کے بیان کے مطابق آگ دارالحکومت کے بڑے سرکاری اسپتال پمز کے مدر اینڈ چائلڈ ہیلتھ وارڈ کی تیسری منزل پر علی الصبح لگی۔

وزیراعظم شہباز شریف کے مطابق اس واقعے میں جاں بحق ہونے والے تمام 14 افراد شیر خوار بچے تھے۔ نائب وزیر داخلہ طلال چوہدری نے بتایا کہ 7 بچوں سمیت 19 افراد کو ریسکیو کیا گیا۔

وزیر صحت مصطفیٰ کمال نے اسپتال کے باہر صحافیوں کو بتایا کہ سی سی ٹی وی فوٹیج سے معلوم ہوا کہ ایئر کنڈیشنر سے ایک چنگاری گری اور ایک منٹ کے اندر آگ پھیل گئی۔

انہوں نے بتایا کہ آگ بجھانے کی کوشش کے لیے 26 فائر ایکسٹنگوشرز استعمال کیے گئے، تاہم وارڈ میں پانی کے خودکار چھڑکاؤ کا کوئی نظام موجود نہیں تھا۔

عینی شاہدین نے شدید دھویں، ٹوٹے ہوئے شیشوں، ہنگامی خدمات کی جانب سے سست ردعمل اور بدنظمی پر مبنی دل دہلا دینے والے مناظر بیان کیے۔ ان کے مطابق سکیورٹی گارڈز نے مبینہ طور پر لوگوں کو عمارت سے باہر نکلنے سے بھی روکا۔