امریکی طیارہ بردار بحری جہاز یو ایس ایس ابراہم لنکن آئندہ ہفتے تھائی لینڈ میں لنگر انداز ہوگا، تھائی عہدیدار

امریکی بحریہ کا طیارہ بردار بحری جہاز یو ایس ایس ابراہم لنکن آئندہ ہفتے تھائی لینڈ میں لنگر انداز ہوگا۔ ایک تھائی عہدیدار نے منگل کو بتایا کہ یہ اقدام مشرق وسطیٰ میں طویل تعیناتی کے بعد کیا جارہا ہے، جبکہ جہاز پر ذہنی صحت سے متعلق خدشات اور حالات بگڑنے کی اطلاعات بھی سامنے آئی ہیں۔

لنکن ہفتے کے روز مشرق وسطیٰ سے روانہ ہوا۔ ڈیموکریٹ ارکانِ کانگریس کے مطابق اس نے 200 سے زائد دنوں سے کسی بندرگاہ پر قیام نہیں کیا، جو مسلسل سمندر میں رہنے کا جدید دور کا ریکارڈ ہے۔

عموماً بحری تعیناتی چھ سے نو ماہ تک ہوتی ہے، تاہم جنگ کے دوران اس میں توسیع کی جاسکتی ہے۔ جہاز پر تقریباً 5 ہزار بحری اہلکار اور میرینز موجود ہیں اور وہ تھائی لینڈ میں طویل بحری سفر کے بعد آرام اور تفریح کے لیے قیام کرے گا۔

لنکن نومبر میں سان ڈیاگو کی اپنی بندرگاہ سے روانہ ہوا تھا اور بعد ازاں ایران کے خلاف امریکی فوجی کارروائیوں میں مدد کے لیے اسے مشرق وسطیٰ بھیج دیا گیا۔

’نیوی ٹائمز‘ اور ’اسٹارز اینڈ اسٹرائپس‘ نے رواں ماہ جہاز پر خودکشی کی کوششوں اور اہلکاروں کے گرتے حوصلے کی اطلاعات دی تھیں، تاہم امریکی وزیر دفاع پیٹ ہیگستھ نے ان رپورٹس کو جہاز کے حالات کی ’’مکمل طور پر غلط عکاسی‘‘ قرار دیا۔

تھائی لینڈ 1954 سے امریکا کا معاہداتی اتحادی اور 2003 سے اہم غیر نیٹو اتحادی ہے۔