جنوبی تائیوان میں موسلا دھار بارش، دفاتر اور اسکول بند

جنوبی تائیوان میں موسلا دھار بارش کے باعث پیر کو متعدد شہروں میں اسکول اور دفاتر بند کردیے گئے جبکہ بعض ریلوے سروسز بھی متاثر ہوئیں۔ حکام نے جزیرے کے شمالی حصے سے رواں ہفتے گزرنے والے متوقع ٹائیفون کے پیش نظر بھی تیاریاں شروع کردی ہیں۔

کم دباؤ کا نظام گزشتہ چند روز سے جنوبی تائیوان پر موجود ہے، جس کے باعث شدید بارش اور سیلابی صورتحال پیدا ہوئی ہے۔

چار ملین سے زائد آبادی والے شہروں کاؤشیونگ اور تائنان کی مقامی حکومتوں نے دفاتر اور اسکول بند رکھنے کا حکم دیا، جبکہ پنگ تنگ، چیائی اور مشرقی پہاڑی کاؤنٹیز تائیتونگ اور ہولیئن میں بھی یہی اقدامات کیے گئے۔

کاؤشیونگ حکومت کے مطابق کم دباؤ کے نظام کے پانچ روزہ دورانیے میں مجموعی بارش 1.3 میٹر سے تجاوز کرسکتی ہے، جو شہر میں عام طور پر پورے سال ہونے والی بارش کے تقریباً نصف کے برابر ہے۔

تائیوان ریلوے کے مطابق مشرقی ساحلی لائن اور کاؤشیونگ و تائیتونگ کے درمیان ٹرین سروسز متاثر ہوں گی۔

مرکزی موسمیاتی انتظامیہ نے بتایا کہ ٹائیفون ساؤڈیل جمعہ کی صبح تائیوان کے شمالی حصے کے قریب سے گزرنے کا امکان ہے۔