لارڈز ٹیسٹ، بابر اعظم کی واپسی کا امکان، پاکستان کی ٹیم میں تبدیلیوں پر غور

پاکستانی ٹیم انگلینڈ کے خلاف دوسرے ٹیسٹ کے لیے اپنی پلیئنگ الیون میں تبدیلیوں پر غور کر رہی ہے، جبکہ اسٹار بلے باز بابر اعظم کے انجری کے باعث سیریز کے پہلے ٹیسٹ سے باہر رہنے کے بعد ٹیم میں واپسی کا امکان ہے۔

تین ٹیسٹ میچوں کی سیریز کا دوسرا ٹیسٹ 27 اگست کو لندن کے لارڈز کرکٹ گراؤنڈ میں شروع ہوگا۔

مقامی میڈیا رپورٹس کے مطابق ٹیم مینجمنٹ پرامید ہے کہ انگلی کی انجری کے باعث پہلے ٹیسٹ سے باہر رہنے والے بابر اعظم دوسرے ٹیسٹ کے لیے فٹ ہوکر ٹیم میں واپس آ جائیں گے۔ بابر کی شمولیت کی صورت میں ٹاپ آرڈر بلے باز اذان اویس کو ٹیم سے باہر کیا جاسکتا ہے۔

رپورٹس کے مطابق ہیڈنگلے میں کھیلے گئے پہلے ٹیسٹ میں ایک اننگز اور 120 رنز سے شکست کے بعد پاکستان اپنی بولنگ کمبی نیشن میں بھی تبدیلیوں پر غور کر رہا ہے۔

ٹیم مینجمنٹ لارڈز کی متوقع کنڈیشنز اور پچ کی صورتحال کو مدنظر رکھتے ہوئے دو اسپیشلسٹ اسپنرز کو کھلانے پر غور کر رہی ہے۔ دائیں ہاتھ کے فاسٹ بولر عبید شاہ کو بھی پلیئنگ الیون میں شامل کرنے پر غور کیا جا رہا ہے۔

رپورٹس کے مطابق وکٹ کیپر بلے باز محمد رضوان کو بھی آرام دیے جانے کا امکان ہے، تاہم حتمی پلیئنگ الیون کا فیصلہ لندن میں کنڈیشنز کا جائزہ لینے کے بعد کیا جائے گا۔

انگلینڈ نے جمعہ کو پہلے ٹیسٹ میں شاندار کارکردگی کا مظاہرہ کرتے ہوئے اننگز کی فتح حاصل کی۔ پاکستان اپنی دوسری اننگز میں صرف 118 رنز پر آل آؤٹ ہوگیا تھا۔

قائم مقام کپتان سلمان علی آغا نے بعد ازاں اعتراف کیا کہ انگلینڈ نے پاکستان کو مکمل طور پر آؤٹ کلاس کیا۔ انہوں نے شکست کی اہم وجوہات میں ٹیم کی غلطیوں اور کنڈیشنز کے مطابق خود کو ڈھالنے میں ناکامی کو قرار دیا۔

پاکستان کو تین ٹیسٹ میچوں کی سیریز کو زندہ رکھنے کے لیے لارڈز میں ہونے والا دوسرا ٹیسٹ لازمی جیتنا ہوگا۔