ٹرانسپورٹ ہڑتال سے چمڑے کی برآمدات متاثر ہونے کا خدشہ، پی ٹی اے کی حکومت سے مداخلت کی اپیل

پاکستان ٹینرز ایسوسی ایشن (پی ٹی اے) کے چیئرمین حامد اے ظہور نے وفاقی وزیر تجارت جام کمال خان کو لکھے گئے خط میں غیر معینہ مدت کی متوقع ٹرانسپورٹ ہڑتال پر شدید تشویش کا اظہار کیا ہے۔ انہوں نے خبردار کیا ہے کہ اس ہڑتال سے درآمدی و برآمدی سرگرمیاں اور چمڑے کی برآمدی کھیپوں کی وقت پر ترسیل بری طرح متاثر ہوگی۔

چیئرمین پی ٹی اے نے کہا کہ پاکستان کی چمڑے کی صنعت، جو سب سے زیادہ ویلیو ایڈڈ شعبہ ہے، پیداواری لاگت میں اضافے کی وجہ سے پہلے ہی برآمدات میں کمی اور مشکلات کا شکار ہے۔ ایسے میں یہ ہڑتال عالمی خریداروں کو آرڈرز کی بروقت فراہمی میں بڑی رکاوٹ بنے گی، جس سے غیر ملکی گاہکوں کے ساتھ کیے گئے معاہدے اور ایل سیز متاثر ہو سکتی ہیں۔

انہوں نے وفاقی وزیر سے التجا کی کہ وہ متعلقہ اداروں کو ٹرانسپورٹ کی بلا تعطل روانگی یقینی بنانے کی ہدایات جاری کریں تاکہ ملک کے لیے قیمتی زرِ مبادلہ کمانے کا عمل رکنے نہ پائے۔