نائب وزیرِ اعظم اسحاق ڈار کی بیت المقدس سے متعلق وزرائے خارجہ اجلاس میں شرکت کے لیے اردن روانگی

ترجمان دفترِ خارجہ کے مطابق نائب وزیرِ اعظم اور وزیرِ خارجہ سینیٹر اسحاق ڈار منگل کو اردن کے دورے پر روانہ ہوں گے، جہاں وہ 5 اگست کو بیت المقدس (القدس) کے معاملے پر منعقد ہونے والے وزرائے خارجہ کے اجلاس میں شرکت کریں گے۔

اسحاق ڈار اردن کے نائب وزیرِ اعظم اور وزیرِ خارجہ ایمن الصفدی کی دعوت پر ہاشمی مملکتِ اردن کا یہ دورہ کر رہے ہیں۔اس اجلاس میں پاکستان سمیت عرب لیگ اور اسلامی ممالک کے وزرائے خارجہ شرکت کریں گے، تاکہ مقبوضہ بیت المقدس میں تیزی سے بگڑتی ہوئی صورتحال پر ایک متفقہ اور یکجہتی پر مبنی موقف اپنایا جا سکے۔دفترِ خارجہ کے مطابق اجلاس میں شریک وزرائے خارجہ اپنے دورے کے دوران اردن کے شاہ عبداللہ دوم سے بھی ملاقات کریں گے۔توقع ہے کہ اسحاق ڈار اجلاس کی سائیڈ لائنز پر شریک وزرائے خارجہ سے دوطرفہ ملاقاتیں بھی کریں گے، جن میں علاقائی صورتحال، بالخصوص فلسطین کی صورتحال اور باہمی دلچسپی کے دیگر امور پر تبادلۂ خیال کیا جائے گا۔

اجلاس میں پاکستان کی شرکت فلسطینی عوام کی اصولی حمایت اور 1967 سے پہلے کی سرحدوں پر مبنی، القدس الشریف کو دارالحکومت بناتے ہوئے ایک آزاد، خودمختار اور متصل ریاستِ فلسطین کے قیام سے متعلق اس کے غیر متزلزل عزم کی عکاسی کرتی ہے۔